خلينا نناقش في البوست ده بعض النقاط اللي هتغير مفهومك عن الفلوس إن شاء الله
١. هل الفلوس جيدة أم سيئة ؟
٢. لماذا أقنعوك أن الفلوس سيئة ؟
٣. الفلوس والحفاظ على دينك
٤. الفلوس والحفاظ على كرامتك
٥. هل أنت تحب الفلوس أم الغنى ؟
١. هل الفلوس جيدة أم سيئة؟
الله سبحانه وتعالى سمى المال في القرآن ( خير ) أكثر من مرة، قال تعالى: إن الإنسان لربه لكنود وإنه على ذلك لشهيد وإنه لحب الخير لشديد.
حب الخير يعني حب المال
قال تعالى: كتب عليكم إذا حضر أحدكم الموت إن ترك خيرا الوصية للوالدين والأقربين.
إن ترك خيرا، يعني إن ترك مالا
وقال تعالى في الحديث القدسي:
إنا أنزلنا المال لإقام الصلاة وإيتاء الزكاة
وقال رسول الله صلى الله عليه وسلم لسيدنا عمرو بن العاص
نعم المال الصالح للعبد الصالح
حضرتك لسه عاوز تتلامض . ولا كده خلاص ؟
هل المال مؤذي؟
المال غير مؤذي . البشر هما اللي مؤذيين
المال آداة . مثل السكين
ممكن تكون لطيف . وتقطع بيها جاتوه
أو تكون مجرم وتقتل بيها،
لكن الإنسان . من فرط إجرامه . عاوز يلصق الجريمة بالسكينة . إنما هوا شخصيا قمور. يعني يبقى قاتل، ومن بجاحته يقول لك لأ دا مش انا
هل المال يغير البشر؟
المال لا يغير البشر . المال يعطي البشر السيئين فرصة لإظهار مساوئهم
هل المال يفسد الناس ؟
المال يزيدك مما أنت فيه
لو كنت بتشرب سجاير هتشرب حشيش
لو كنت بتشرب بانجو هتشرب كوكايين
لو كنت بتصلي هتبني مسجد
لو كنت بتكفل يتيم هتكفل دار أيتام
كفاية بجاحة . يعني مش كفاية عليكم إنكم بتذنبوا، وكمان ما عندكمش رجولة تحمل مسؤولية الذنب، وعاوزين تلزقوها في الفلوس
هل السعي لكسب المال وحش؟
الله سبحانه وتعالى سمى الرزق ( فضل ) أكثر من مرة
قال تعالى: فإذا قضيت الصلاة فانتشروا في الأرض وابتغوا من فضل الله
يعني بعد صلاة الجمعة . نسعى لكسب الرزق . اللي هوا الفضل
طب و والناس بتحج؟
أظن عيب نبقى في الحج والحرم ولابسين ابيض ف ابيض وننشغل بالفلوس..دا ظنك انتا
قال تعالى: ليس عليكم جناح أن تبتغوا فضلا من ربكم فإذا أفضتم من عرفات فاذكروا الله عند المشعر الحرام
أمال إيه المشكلة في الفلوس؟
الفلوس ما فيش فيها مشكلة ولا حاجة
الفلوس طالما تحقق فيها ٣ حاجات تبقى تمام:
– تيجي من حلال وبما لا يشغل عن الواجبات
– تتصرف في الحلال بدون إسراف
– يؤدى واجبها ( الزكاة )
هل التلاتة دول مستحيلين؟
لأ.
٢. لماذا أقنعوك أن الفلوس سيئة؟
أبوك أقنعك إن الفلوس وحشة . عشان كان فقير . فيهرب من لومك ليه
الحكومة صورت لك في الأفلام دايما إن الفقير محترم وجدع
وإن الغني حرامي، وحزين
عشان انتا ترضى بالفقر.
عشان طول ما انتا فقير، فانتا مسحول في أكل العيش، فمش هتتكلم في السياسة، طول ما انتا فقير.
فأقصى أحلامك هي الأكل والشرب، فما تكلمهمش في الحرية والديموقراطية والمرقعة والكلام الماسخ ده اللي لا يتناسبوا مع ديننا ولا أخلاقنا ولا ثقافتنا ولا هويتنا المتفردة.
خليك في أكل عيشك يا مواطن، وما تفرهدش الحكومة معاك
٣. الفلوس والحفاظ على دينك
لما يكون معاك فلوس مش هتفكر تسرق فهتحافظ على دينك
لو معاك فلوس وواحد ضغط عليك في رشوة، أو ربا،
هتقول لأ بحرية كاملة
لو معاك فلوس هتتزوج، ف هتعف نفسك، فهتحافظ على دينك
لو معاك فلوس، ومتزوج، وعاوز تعدد.. هتقدر، فهتعف نفسك، فهتحافظ على دينك
لو معاك فلوس، هتكمل خمسين دينك.
هتطلع زكاة وهتحج، الزكاة والحج يمثلوا ٤٠ ٪ من دينك
والاتنين مشترطين للقدرة المالية
الزكاة محتاجة نصاب ٨٥ جرام ذهب عيار ٢٤،
يعني حوالي ٣٠٠ ألف جنيه
والحج لمن استطاع إليه سبيلا
ف ٤٠ ٪ من أركان الإسلام مشترطين على القدرة المالية، الفلوس يعني
لو معاك فلوس، هيبقى عندك وقت وقدرة تمارس شعائر دينك
هتعرف تروح تعمل عمرة مثلا
هتقدر تتصدق
٤. الفلوس والحفاظ على كرامتك
لو معاك فلوس مش هتحتاج تركب ميكروباص، فهتحافظ على كرامتك من بهدلة الميكروباصات،
كذلك زوجتك مش هتضطر تحتك بالناس في ميكروباص
لو معاك فلوس، زوجتك مش هتحتاج تشتغل، فهتحافظ على زوجتك من البهدلة
لو زوجتك ما بتشتغلش هتكون ليك القوامة الكاملة،
اجتزاء القوامة ينخر في أساس البيت والأسرة
لو معاك فلوس هتقدر تكون كريم، لكن هتبقى كريم من غير فلوس ازاي
٥. هل أنت تحب الفلوس أم الغنى ؟
إنتا بتحب الفلوس..لكن بتكره الغنى.
الغنى محتاج تعب وانتا مش عاوز تعب
الغنى هيحملك المسؤولية . وهيشيلك الهم،
وانتا لا عاوز تتحمل مسؤولية، ولا تشيل هم
فانتا عاوز يكون معاك فلوس، لكن مش عاوز تكون غني
عشان كده طول عمرك بتبلع كل الحشو اللي بيتحشى في دماغك من صغرك، بتستقبله وتتقبله وتصدقه وترسخه في عقلك،
وبناءا على ده بتطلع أفكار، وبناءا على أفكارك، بتعمل تصرفاتك
و تصرفاتك كلها في سكة ضد الغنى
وبعد ده كله ترجع نستغرب انتا فقير ليه
وبعد ما تبقى فقير، تبتدي تطلع الردود بتاعة إن الفقر حشمة
والغنى أساس الشرور
والفلوس بتغير النفوس
وكلام التكاتك ده.
هوا احنا ما ينفعش معانا يكون فيه فلوس، وأدب واحترام في وقت واحد
يعني لو فلوس يبقى لازم حشيش ونسوان . ما تمشيش معاك صدقات وعمرة وكرم وكرامة.
هوا ينفع، بس انتا عقلك الباطن مريحك على كده