انت ليه بتتعلم؟

عمرك سألت نفسك ..هو انت ليه بتتعلم؟
فى الاغلب الناس مبتسألش السؤال ده .. واللى بيسأله بيجاوب الاجابة اللى تديله الدرجة النهائية فى الدراسة او تنجحه فى الانترفيو !!!
اولا انت لازم تتعلم ازاى “تتعلم” لازم تفهم العملية نفسها بتم ازاى؟ .. وانت ايه الحاجات اللى بتؤثر عليك سواء سلبا او ايجابا.. علشان تقدر تطور نفسك
اهمية الموضوع ده بتبدأ من ان الانسان ربنا خلقه فى حاجة الى التعلم بعكس الحيوانات مثلا.. و تقدر تلاحظ دا بسهولة ان مثلا الطيور والاسماك بتمشى فى اسراب وباشكال محددة .. على الرغم من ان مفيش “طائر” مثلا عمل Training لباقى الطيور وقالهم لما هامشى كده هاتعملوا كده او لما يحصل كده هاتعملوا كده… فالموضوع ربنا بيوحى للحيوانات … يقول الله تعالى:
وَأَوْحَى رَبُّكَ إِلَى النَّحْلِ أَنِ اتَّخِذِي مِنَ الْجِبَالِ بُيُوتًا وَمِنَ الشَّجَرِ وَمِمَّا يَعْرِشُونَ

بعكس الانسان اللى الاصل بيتولد مش عارف حاجة:
وَاللَّهُ أَخْرَجَكُمْ مِنْ بُطُونِ أُمَّهَاتِكُمْ لَا تَعْلَمُونَ شَيْئًا وَجَعَلَ لَكُمُ السَّمْعَ وَالْأَبْصَارَ وَالْأَفْئِدَةَ ۙ لَعَلَّكُمْ تَشْكُرُونَ.
فالانسان بيتولد مش عارف .. والحيوان بيوّحى اليه
فَبَعَثَ اللّهُ غُرَاباً يَبْحَثُ فِي الأَرْضِ لِيُرِيَهُ كَيْفَ يُوَارِي سَوْءةَ أَخِيهِ قَالَ يَا وَيْلَتَا أَعَجَزْتُ أَنْ أَكُونَ مِثْلَ هَـذَا الْغُرَابِ فَأُوَارِيَ سَوْءةَ أَخِي فَأَصْبَحَ مِنَ النَّادِمِينَ (31)

من هنا بدات فكرة انك لازم تتعلم.

طيب هل التعليم سهل… بالعكس التعليم عملية معقدة.. بس يعنى ايه “معقدة”؟
انت مثلا لو حبيت تتعلم تستخدم الة حاسبة .. كل اللى انت محتاج تعرفه هى الزراير اللى موجودة فيها .. بمجرد ما تعرفهم لو قلتلك اجمع 23256 + 123654 او اطرحهم من بعض او اضربهم او اقسمهم على بعض .. هاتقدر تعمل ده لان الموضوع Simple
لكن مثلا لو قلتلك انك هاتشتغل محاسب .. الموضوع هايبقى complicated .. بمعنى انك هتلاقى صعوبة فى انك تتعلم طرق الحسابات والمعادلات اللى بتستخدم فى الموضوع والجداول وفكرة الداين والمدين “الاتنين دول اللى كرهوا الناس فى حياتهم” ومعدل الاهلاك وكل الحاجات دى … لكن بمجرد ما بتفهم “الجداول والمعادلات” اللى بتم هاتقدر بعدها “تغير الارقام” بس .. بمجرد ما وصلت للفكرة .. اغلب الحاجات “اللى اتعلمتها” هايبقى اسهل شوية انك تطبقها فى اى شركة تانية هاتشتغل فيها … فده يعتبر الموضوع complicated

لكن مثلا لما هاتشتغل فى التسويق او على الـ Social Media هتلاقى الموضوع معقد Complex .. الفكرة هنا ان فى حاجات الناس اتعلمتها زى ما اتعلمت فى المحاسبة .. بس الفرق هنا انك عندك عوامل كتييييير متغيرة .. انت هنا بتتعامل مع اشخاص .. والعامل المشترك بينهم هو انهم عندهم اهتمامات.. بس الاهتمامات دى مختلفة تماما .. واختلافات اى عامل بتأثر عليك بشكل كبير .. فمش معنى انك نزلت Template من على الانترنت انت هاتقدر تعمل الموضوع .. لان الموضوع هايختلف على حسب انت بتكلم مين .. سنهم كام .. هدفك ايه من الرسالة اللى هاتوصلها.. هاتوصلهم بأى طريقة.. عرضك للطريقة هايفرق … الاحداث “سواء” سياسية/اجتماعية/رياضية .. كل دى عوامل ممكن تخلى “مثلا” شركتين بيقدموا نفس المنتج/الخدمة لنفس الناس يعملوا حاجات مختلفة تماما عن بعض .. او حتى لو انت نفس الشخص اللى عمل الموضوع اللى نجح جدا قبل كده .. لو طبقته فى مكان تانى ممكن يفشل جدا فدا اللى بيسموه ان الموضوع معقد Complex
فالفكرة انه معقد بس محتاج شوية تدريب ..لكن عن فهم

واحدة من اشهر الاسباب اللى بتخليك متكلمش اى حاجة هى فكرة الدافع.. واشهر الاسباب اللى بتساعد على ضعف الدافع عندك هى فكرة “التسويف” Procrastination
التسويف مختلف عن الكسل.. فمثلا هتلاقى ناس كتييير بتتكلم عن موضوع “مثلا” طلب العلم وتقولك ما اصلا انا مش قادر اعمل كده بين قوسين “ما استطعتم”
حديث الرسول هنا ربط الاستطاعة بالقدرة .. انت قادر ..بس انت بتسوف فى الموضوع .. فالتسويف مثلا ممكن انك تبقى عارف انك محتاج كورس معين .. وفى بعض الاحيان بتكون حملته فعلا على جهازك .. وتاجل مذاكرته “بمزاجك” وتقعد نفس الوقت اللى كنت هتذاكر فيها مبتعملش حاجة غير انك فاتح الفيس بوك وعمال تعمل Scroll down وتشوف اى حاجة… الموضوع ببساطة انك اجلت حاجة مهمة “قاصد” فى مقابل انك عملت حاجة تانية مش مهمة.

طيب ازاى تتخلص من الموضوع ده؟
فى احد الكتب اللى اتكلمت فى الجزء ده اسمه “The Procrastination Equation”
الكاتب بيشرح ان “الحافز بيساوى التوقع فى القيمة على الاندفاع فى التأخير”
التوقع بيساوي يقينك بالمكافئة اللى هاتحصل عليها
القيمة هى اهمية الحاجة “المكافئة” دى بالنسبالك ايه
الاندفاع هو انك بتعمل حاجات “بمجرد ما الفكرة تجى فى دماغك” ودا للاسف بيؤدى فى بعض الاوقات لعادات مدمنة… زى مثلا: انك اتعودت فى الاول كل ما تلاقى نفسك فاضى تسمك الموبايل .. وبعدها اتعودت كل ما تمسك الموبايل تفتح الفيس بوك .. فاصبح الفيس بوك ادمان بالنسابلك

اهم حاجة فى الجزء ده انك تعرف الاسباب دى وتبتدى تراقبها علشات تعرف هل عندك مشكلة فى جزء معين من الاجزاء “او الاجزاء كلها” اللى بتأثر على الدافع بتاعك ..علشان تبتدى تفكر انت هاتحل الموضوع ده ازاى.