ابتدا الدرس يا ذكي

في كل حاجة هااتعلمها في حياتك هاتمر فيها بـ ٣ مراحل:
١- انك حافظ مش فاهم:
مرحلة فاشلة جدا جدا في اي حاجة بتتعلمها بتنتج عن تعليم مش مظبوط .. بتعافر علشان تعرف تطبق حاجة وللاسف مبتعرفش ..فبيتحول الموضوع لكره كامل للفكرة دي وبتقرر انك عمرك ما هاتطبقها تاني وبتتنقل وقتها للمرحلة التانية
٢- فاهم مش حافظ: مرحلة فاشلة في حياتك بس بشكل مختلف .. الفشل في انك بتعرف تطبق اللي اتعلمته علي بعض الامثلة … وبتفشل في الباقي .. بس فشلك هنا مش مضر لصورتك قدام مجتمعك .. لانك ببساطة بتعرف تكسب اي حد في الكلام .. بتعرف تشرح “الحاجة” اللي انت فاهمها قدام الناس ..فبيعرفوا انك فاهم .. تقدير المجتمع ليك ممكن يكون احترام لانك اشتغلت في اكتر من شركة – خاصة لو شركات Multinationals – علي الرغم من انك ممكن تكون روحت الشركات دي واترفدت منها لانك مش قادر تطبق اللي انت فاهمه علي المثال بتاعهم .. بس بما انك هاتكتب في الـ CV بتاعك اسامي الشركات دي “اللي طردوك” وبما ان محدش “من اصحابك” هيسألك ويتأكد انت مشيت ليه من الشركات دي ..فهاتبقي في نظرهم الشخص الجامد اللي اشتغل في اكتر من شركة.
النظرية هنا اتبنت علي عوامل كتير “اهمها” مرحلة الطفولة بالنسبالك .. وقت ما بيبقي اكبر همك هو اللعب .. انت وقتها بتجرب حاجات بس مبتحسبش تجربتك ولا بتشوف العوامل اللي بتضرك او بتساعدك .. فبتكبر بتدور علي “الاختصارات” .. بتشوف اي حد نجح وتقوله قولي عملت ايه علشان تنجح ..انا مش عايز اجرب ..انا عايز انجح!!
ببساطة انت بقيت عايش “رد فعل” علي مرحلة سابقة مكنتش متحكم فيها.

٣- المرحلة الاخيرة هي انك تبقي حافظ وفاهم :
دي من اكتر الاوقات اللي هاتستمتع بيها باي حاجة بتعملها وانت في المرحلة دي … لو قريت عن طرق التعليم الحديثة زي Blended Learning او لو فهمت مفهوم زي الـ gamification هتلاقي الموضوع قايم علي جزئين.. الجزر الاول وهو – Structuer – او الطريقة اللي هاتتلقي بيها الموضوع وتجهيز الوسائل والـ learning cycle اللي هاتمر بيها علشان الموضوع ينجح .. ودا ممكن نشبه بجزأ انك حافظ الموضوع
والجزء التاني وهو – Content – او الحاجة نفسها اللي هاتتعلمها .. وازاي تبقي انت كمتلقي متفاعل وايه الحاجات اللي تتعمل علشان تساعدك تبقي كده .. ودا اقرب لانك فاهم كل حاجة وانت كـ Instructor تقدر تغيرها بما يتناسب مع طبيعة الاشخاص اللي قدامك.

اهم حاجة في الموضوع انك تبقي – واعي – انت فين .. مفيش مشكلة انك تبقي في المرحلة التانية .. احنا اصلا كلنا فيها في اغلب الحاجات وبعضنا في المرحلة الثالثة في بعض الحاجات … الاهم في الموضوع هو بلاش انك تعيش فى طريق مجبر عليه عشان محدش له عندك حاجة.