ليه بتقول إن ربنا سبحانه وتعالى سمى المال في القران ( خير )
بس ما قولتش إن ربنا سبحانه وتعالى سمى المال بردو ( فتنة ) ؟!
الناس عندها مشكلة مع تصورهم للفتنة،
تصور الناس عن الفتنة إننا دورنا إننا نفتتن بيها
يا راجل، يعني هيا عشان فتنة . تقوم تفتتن بيها ؟!!
دي حاجة كده عاملة زي ما تعتبر إن دور المطب هوا إنك تلبسه،
يا فندم الفتنة دور حضرتك معاها هوا إنك تقاومها.. مش تفتتن بيها.
وقبل ما تقاومها
دورك إنك تتجنبها
وقبل ما تتجنبها
دورك إنك تبعد عنها
يعني الشارع ده فيه كلب،
ما تدخلوش أصلا
مضطر تدخله، عدي بعيد عن الكلب
الكلب هبرك، قاومه
الفتنة شخصيا مالهاش ذنب، إنتا اللي بتروح لها وتمشي وراها
لكنها هيا شخصيا كفتنة ما عملتلكش حاجة
وإلا، ما ربنا سبحانه وتعالى قال:
واعلموا أنما أموالكم وأولادكم فتنة
فهل معنى ده إن ولادنا وحشين ؟!
ما هما فتنة
بس يبقوا فتنة إمتى؟
لما تسرق عشان تعيشهم كويس، هنا يبقوا ولادك فتنة
لما تداهن في الحق عشان خايف عليهم، هنا يبقوا ولادك فتنة
باستغرب جدا من اللي بيقولوا
( لا ذنب للعنب فيما يفعل الخمر )
يا جماعة، والخمر شخصيا ذنبه إيه ؟!
هوا الخمر عمل حاجة ؟!!
الإنسان هوا اللي عمل
فالمفروض نقول ( لا ذنب للخمر فيما يفعل الإنسان )
هتجيبوها في الخمر؟!
هوا الخمر اللي اتدحلب ودخل بقك على حين غرة يعني ؟!
سهاك واتشرب لك، ولا انتا اللي شربته ؟!!
بس اللى عملته وانا سكران ما كنتش حاسس بيه
يا ولا
وانتا وانتا بتسكر ما انتا كنت فايق وعارف انك هتسكر
ولا كنت فاكرها شاكاليطه، الإنسان كائن هجاص
المال ما آذاكاش في حاجة، إنتا اللي استغليت المال في الأذى.
واحد كان كاتب ( الواحد أول ما بتجي له فلوس أول حاجة بيفكر فيها إنه يعصي ربنا )
آه.. دا انتا اللي كده
لكن فيه ناس بتخرج صدقة أي مال بيجيلها قبل ما تصرف منه على نفسها، مش قلت لك لا ذنب للعنب فيما يفعل الخمر