عندك وقت؟
بيعه واشتغل موظف
اجره واشتغل فري لانسر
استثمره واعمل بيزنس
زي ما بقولك دائما انت مش محتاج فكره تنجح
انت محتاج تنجح طريقة تفكيرك
ولازم تبزنس دماغك والا هتضيع
واعرف ان الوقت هو اغلى واخطر سلعه
- غالي؟ لان عمرك هو عباره عن شوية وقت
- خطر؟ لانه مش بيتخزن وملهوش مدة صلاحيه وبيطير وبيضيع وقتي
- سلعه ؟ لانه بيباع وبيشترى وبـ يستثمر
وانت اعمل المريح والمناسب ليك
تبيعه / تأجره / تستثمره براحتك
بس اوعى تضيعه فى الفاضي والهايف لان وقتك هو اكتر حاجه هتندم عليها فى حياتك
بس الاهم من انك تفكر هتبيعه ولا تأجره ولا حتى تستثمره
الاهم انك تتمنه ؟ تسعره ؟ مش قولنا انه سلعه ؟
ولا انت هتنزل السوق تقول معايا شوية وقت واللى تدفعه؟
لازم فى الاول تعرف وقتك قيمته كام ؟
علشان على الاقل تعرف تفاضل وتقارن الفرص اللى قدامك
يعني ممكن الاقي وظيفه هبيع فيها وقتي جمله هتبقى ساعتي فيها اغلى من ساعتي لما ابيع وقتي قطاعي واشتغل فري لانسر
سيبك من وهم المسميات …فيه موظف عايش افضل واريح وبيعمل فلوس شهريه افضل من اللى فاتح بيزنس والعكس صحيح
نيجي بقى للمشكله وهي ان اغلب الناس بتسعر وقتها بمزاجها يعني هو شايف ان وقته من وجهة نظره يساوي كذا وهو كده وخلاص
طيب اعمل ايه ؟
لو انت مسعرتش او بعت وقتك قبل كده يبقى اكنك لسه فاتح محل وبتربي زبون ومتضيعش وقتك كتير فى انتظار افضل فرصه واعلى سعر … طالما الفرصه معقوله ادخل بقلب جامدم
هو انت مش عبيط علشان ترفض تشتغل شهر برقم قليل من وجهة نظرك وتعمل فيها ناصح … وبعدين تبيع الشهر ده ببلاش ومتشتغلش اساسا
طيب انت مسعر وقتك وشغال بالفعل … يبقى طول الوقت ركز فى حتتين مهمين جدا
الاولى : انك طول الوقت تتابع السوق والاسعار لانك ممكن تكون فى المكان الغلط اللى بيخمك وبيشتري وقتك بأرخص سعر فى السوق
التانيه : هي انك طول الوقت تطور من مهاراتك وامكانياتك ومعلوماتك علشان تعلي من قمية وقتك … لان كل اما امكانياتك ومهاراتك تكون اكبر … كل اما ساعتك هتكون اغلى
وخد بالك من حاجه مهمه …الطريق الطبيعي والصحيح انك الاول تسعر وبعدين تبيع جمله وتبقى موظف … شويه شويه لو شايف انك لو بعت قطاعي افضل وهتكسب اكتر اعمل ده واشتغل فري لانسر … شويه شويه لقيت فرصه هتستثمر فيها وقتك وهيكون العائد اغلى واعلى … اعمل كده واعمل بيزنس
لكن انك تنط مره واحده وتروح تعمل بيزنس وتستثمر وقتك من غير ما تكون عارف ومتأكد من قيمته ومعتمد على وجهة نظرك فيه يبقى فى الغالب هتزعل كتير
فيه حد يبيع او يأجر او يستثمر فى حاجه مش معروف تمنها ولا قيمتها؟مش كده ولا ايه ؟
زاوية رؤيه