فلان باعني … تخيل!
لا اجمد كده امال
بقى يا راجل شغال فى التسويق ومجال البيع بالعموله وتكون مشكلتك ان فيه حد باعك ؟
خد بالك ان كل علاقه وليها حدود وكل واحد وليه طاقه … وانك تعتقد فى الناس ان طاقتهم وتحملهم بلا حدود تبقى انت اللى عندك مشكله كبيره ومعرض لصدمات كتيره فى حياتك وجزء كبير من الصدمات دي انت السبب فيه لانك مقدرتش الموقف صح
يعني مش معنى انك قعدت مرتين مع واحد على القهوه انك تطلب منه تبات عنده يومين!
او تطلب منه مبلغ كبير جدا على سبيل السلف! ولو رفض يبقى انت اتصدمت فيه وهو حد مش كويس!
يجي واحد مثلا يقولي فلان ده محترم وراجل قوي لان كان عنده فرصه يبعني بألف جنيه ومبعنيش
اقوله لأ … لحظه لو سمحت …
الكلام ده مش دقيق خالص …
وياريت نحط الكلام فى نصابه الصحيح وهو ان فلان ده محترم وراجل قوي معاك حتى ألف جنيه.
الصدمه والمشكله مش ان حد باعك؟ المشكله الحقيقيه هو باعك ازاي وخد عموله وكسب فيك ولا لأ؟
ركز بقى معايا كده ….
لو حد باعك ببلاش ؟
يبقى غبي وتبقى مشكلتك انت مش مشكلته هو … وهي انك مش بالذكاء الكافي علشان كنت تدرك غبائه من بدري وتجتنبه وتخرجه من دايرتك نهائي من الاول
طيب لو حد باعك بخساره ؟
يعني باعك بمقابل اقل من قيمتك … يبقى غبي وده يرجعنا برضه للنقطه الاولى
طيب لو حد باعك وكسب فيك ؟ دي اعمل فيها ايه ؟
دي بقى تخليك تشتغل على نفسك وتبقى غالي قوي لدرجة ان علشان حد يفكر يبيعك يبقى محتاج اغراء اكتر من ألف جنيه
انا مش بقولك ان الدنيا سوده والناس كلها خاينه بس وانت ماشي فى حياتك لازم تحضر نفسك لأسوأ السيناريوهات
الثقه اللى انت محتاجها اكتر فى حياتك مش هي ثقتك فى الناس انها تكون صح
انت محتاج اكتر تكون واثق انك بتفكر وفاهم الناس صح