تعرف منين إن اللي بينتقد كلامك يقصد ينتقدك انتا شخصيا . وبيستخبى وراء انتقاد كلامك ؟!
لو لقيت انتقاده مبالغ فيه جدا !!
مبالغ فيه بقدر يتجاوز انتقاد كلامك لو كان غلط فعلا
يعني تخيل مثلا إن حد سألك الساعة كام
فقلت له ١١ ونصف
وهيا كانت ١١ ونصف إلا خمسة مثلا
فلقيت واحد فط من مكانه . ورزعك محاضرة عن قيمة الوقت
وعن أمانة السؤال
وإننا خسرنا الحرب العالمية التانية عشان واحد قال الساعة غلط
دا ما تردش عليه
دا بيكرهك انتا شخصيا
دليل تاني تعرف منه
لو لقيته انتقدك على حاجات خارج الغلطة الحالية
يعني قال لك مثلا
وعامل لي فيها شيخ . وانتا بتقول الساعة غلط
وعامل في فيها مهندس . ومش عارف تقرا الساعة
يعني بياخد الاتهامات لمساحات خارج الغلطة محل النقاش
فيه ناس مثلا هترد على البوست ده إن كلمة ( انتا ) المفروض تتكتب ( انت )
قال تعالى
قد بدت البغضاء من أفواههم