– الو … النجاح معايا ؟
ايوه مع حضرتك اتفضل
ممكن حضرتك تقولي بسرعه وبشكل مختصر اجيلك ازاي؟
طيب بالراحه كده قولي انت عايز مين الاول علشان تبقى متأكد انت جاي لمين علشان متضربش المشوار على الفاضي زي ناس كتيره قبلك
ايه ده ؟ هو النجاح مش واحد ؟
لا طبعا مش واحد …
احنا عائله كبيره قوي وكلنا اسمنا النجاح
فيه نجاح صاحب العلم الكبير
فيه نجاح صاحب السمعه الطيبه
فيه نجاح صاحب الفلوس الكتيره
فيه نجاح صاحب الجسم المثالي والعضلات
فيه نجاح صاحب المعارف الكتيره والعلاقات
احنا كتير قوي …
بس انا عايز كل دول !!
للاسف مفيش كده ومش معنى اننا عائله واحده يبقى كلنا واحد وكل واحد مننا فيه صفه طاغيه بزياده … ومفيش حد فينا فيه كل حاجه بنفس النسب
- طيب اوصفلي الطريق بسرعه الله يخليك
علشان ننجز الوقت وانا لما اجي اتفاهم معاكم
للاسف مش هينفع لاننا مش مع بعض وكل واحد فينا فى حته وكل واحد ليه طريق شكل وعلشان كده لازم تحدد فى الاول قبل ما تتحرك خطوه انت عايز مين فينا والا هتوه وتضيع
تمام … انا حددت طريقي انا عايز النجاح (X)
تمام جدا … ممكن تقولي انت واقف فين دلوقتي ؟
انت مالك انا واقف فين قولي بس اجيلك منين ؟
مهو انا علشان اوصفلك الطريق صح
لازم اعرف الاول انت واقف فين وجاي منين ؟
انا مش واقف فى حته انا لسه بادىء ومش عارف الطريق كويس
طيب ركز معايا … انت بقى عايز توصل للنجاح (X) يبقى انت مدرك معناه وصفاته وفيه قدامك بعض الناس اللى واصله لمرحله حلوه فى طريق النجاح (X) صح ؟
صح
امشي وراهم … تابعهم … راقبهم … وانا هنا بقولك بصفة الجمع لانك مش هينفع تتابع واحد بس لانه ممكن يقع منك فى الطريق … او يطلع مش الشخص اللى رايح للنجاح (X) وانت قيمته غلط
لما تتابع الناس دي بقى وتراقبهم هتعرف بالظبط انت واقف فين وواصل لحد فين والمفروض تمشي ازاي وتمشي معاهم واهو تتونس فى الطريق
وخد بالك وانت ماشي فى الطريق هيقابلك ناس رايحه للنجاح (B) و للنجاح (C) اوعى تسمع منهم او تركز معاهم لان طريقك غير طريقهم واللى ينفع معاهم مينفعش معاك وهتضيع وقتك وهتشتت نفسك على الفاضي
واياك من مقلب الطرق المختصره
واوعى تعمل فيها فهلوي وتضيع وقتك زي كتير قبلك وتحاول تلاقي طريق مختصر او نجاح فيه كل حاجه لانه مش موجود
واهم حاجه اعمل حسابك على ان الطريق فيه مدقات ومطبات كتيره … استحمل … ومفيش طريق سليم وسالك ومتحاولش تدور لانه وهم … واللى يقولك كده … يبقى يا اما مطلعش على الطريق قبل كده او بيضحك عليك