مش لازم تحس بليلة القدر عشان تاخد ثوابها

على فكرة : مش لازم تحس بليلة القدر عشان تاخد ثوابها !!
الموضوع ملوش علاقة بالاحساس !! قال عليه الصلاة والسلام : من قام ليلة القدر إيمانا واحتسابا غُفر له ما تقدم من ذنبه !
ماقالش : من حس إنها ليلة القدر غُفر له ما تقدم من ذنبه !!
يعني ممكن – عادي جدا – تكون تعبان أو مرهق ، أو ماتحسش بخشوع أو روحانيات عالية في أحد الليالي الوترية ، وتصادف إنها ليلة القدر ، وربنا برضه يكتبلك أجرها كاملا إن شاء الله لإنك قمت ليلتها “إيمانا واحتسابا” !!
وممكن ليلة تانية تقوم وتصلي وتبكي وتخشع وما تكنش الليلة دي هي ليلة القدر! عادي جدا !!
أحسنوا الظن بربكم ، ربنا كريم ورحيم ، والحمد لله إنه ماجعلش ليلة القدر بالاحساس ، وإلا ناس كتير كانت هاتتحرم منها !! والحمد لله إنه جعلها على قدر الاجتهاد والاخلاص في تحصيل الأجر !! المهم إنه وقت ما ينظر إليك يلاقيك واقف على بابه !! فلو كنت قمت ليلة القدر إيمانا بفضلها واحتسابا لأجرها = إن شاء الله يكون وهبك فضلها وبركتها وأجرها !
مفيش داعي تزعل نفسك أو تجلد نفسك أو تعتقد إنك اتحرمت من الأجر عشان ما عيطش أو ما خشعتش أوي أو ما حسيتـش أوي بالليلة !!
لو حسيت يبقى خير وبركة وفضل من الله ، ولو ماحسيتش فده لا يمنع الأجر!!
الحمد لله ربك كريم ، جعل الأجر على قدر الأعمال وإخلاص النية فيها !
أما بقا لو كانت الليلة فاتتك ، فلسة قدامك الفرصة اليومين الجايين ! عندك ليلتين بحالهم ، يرفع الله فيهما أقوام ويخفض فيهما آخرين !! ولله عُتقاء من النار ، وذلك في كل اليلة !! عندك فرصة لحد آخر ثانية في رمضان ، وربك كريم ورحمته وفضله واسعين اوي اوي اوي 🙂
تقبل الله منا ومنكم ..