إزاي تعرف إنك بتحب بجد؟

بتفرق من شخص للتاني بس دي من أشهر العلامات
-مبدئيًا االحب الحقيقي بيجي بعد فترة من العشرة مع الشخص ومعيشتكم سوا لمواقف إنسانية مختلفة فيها اختلافات وخلافات في وجهات النظر وممكن خناقات وغيرة ونقاش وأنشطة مشتركة إلخ قبل ما كل ده يحصل ممكن تسميه إنجذاب أو كميا أو إعجاب أو إنبهار.
-هتنتقل من مرحلة الإنبهار بإنه شخص رائع وعظيم ويجنن ومفيهوش غلطة لمرحلة إنك عارف عيوبه كويس جدًا وظروفه إللي مش ضروري تكون متفصلة عليك وحاطط إيدك عليها كلها لكن متقبلها لإنها جزء منه وبتحاول تتكيف عليها وتتفاعل معاها.
-هتلاقي نفسك بتحب تشوفه أو تكون معاه وهو بيعمل أنشطة عادية مفيهاش اي استمتاع وحاسس إنك مستمتع بده ومش عايز تكون معاه بس وقت الفرفشة والرغي والدلع.. يعني بتكون مستمتع معاه وهو بيشوف شغله، أو بياكل، أو بيعمل مشاويره العادية الرخمة.
-ما بتكونش عايزه وبتفكر فيه بس لما تكون وحيد أو محبط أو زهقان أو عايز تخرج أو ترغي.. بالعكس إنت في عز ما إنت ملخوم ومشغول وسعيد ومنخرط في أنشطة وشغل إنت برضه محتاجه وبتفكر فيه وعارف تفضي له وقت.
-لما بيحصل لك اي حاجة حلوة أو بتعمل أي نشاط سعيد بتحس إنه فيه حاجة ناقصاك وإنه نفسك يكون معاك علشان فرحتك تكمل.
-عندك استعداد تعمل تضحيات كبيرة علشان تكون معاه عمرك ما تصورت إنك ممكن تعملها علشان حد.. وهتلاقي إنه فيه حاجات كتير بتهون في مقابل إنك تكون معاه.
-مهما كان حواليك ناس بيحبوك وعايزينك حتى لو كانوا أجمل وأشيك وأذكي وبيعاملوك ألطف فإنت مش بتشوف غيره وغالبًا مش بتعرف تدخل في علاقات عاطفية ولو دخلت بتلاقي دايمًا إنك مش قادر تحس مع حد إللي بتحسه معاه ولا تشوف حد زي ما إنت شايفه.
-تفكيرك في نفسك وراحتك بيقل بالتدريج في مقابل إنه يكون سعيد. وبتبذل مجهود كبير علشان تكون معاه وتفهمه وتكون قريب منه ما بتعملوش علشان اي حد تاني.
-الوقت عمال يعدي عليكم.. أسابيع وشهور وساعات سنين وإنت ثابت على مشاعرك ناحيته.. مشاعرك مش بتقل أو بتتغير بل بتزيد.
-بتحس إنه الشخص ده بيطلّع أحسن ما فيك ومعاه بس بتكون إنت على طبيعتك ومش خايف تظهر عيوبك أو تعترف بضعفك معاه.
-حاسس إنه ده أكتر شخص بيفهمك وفيه إنجذاب جسدي كبير ليه.
-بتحس إنك أضعف وسيطرتك على نفسك بتقل بالتدريج.
-بتبقى أكثر تهورًا وإندفاعًا في علاقتك بيه عن باقي الناس وبتقفش نفسك لحظات بتلغي عقلك وتفكيرك المنطقي إللي متعود تتعامل بيه مع الناس التانية.
-لو إنت شخص ناضح وكبير سنًا بتقفش نفسك بتتصرف زي المراهقين ساعات وبتسأل نفسك إيه الهبل إللي أنا بعمله ده؟