المسلمين دول أسهل طريق للشهرة..لو كنت مش مسلم كان زماني طلعت أي هري عن الرسول أو احرق القرآن..وفي خلال ساعات هتكون صورتي واسمي على أشهر هاشتاج في السوشيال ميديا..دعاية مجانية عالمية بتحول شخصيات مجهولة ماكانش حد يعرفها ولا هيعرفها لأشهر ناس في العالم..
سلمان رشدي كاتب مغمور حتى أهله ما بيشتروش رواياته..يقوم المسلمين يحولوله لأشهر كاتب روائي في العالم وضحية لحرية الرأي وبدل ما كان قاعد بالبيجامة في البيت مش لاقي تمن السجاير بقى أكبر جامعات العالم يتطيره فيرست كلاس عشان يسافر يحاضر وياخد على المحاضرة الواحدة عشرات الآلاف من الدولارت..شكرا للمسلمين.
رسام كاريكاتير عبيط في صحيفة صفرا كان هيعيش ويموت وجاره ما يعرفش أساسا أنه بيرسم..يقوم المسلمين يحولوه لأشهر رسام كاريكاتير في العالم ويتحول لأيقونة لحرية الرأي ورسوماته تتشهر وكبرى الصحف العالمية تتمنى أن يرسم لهم رسمه والحكومة تعين له بودي جاردز وعربيات مصفحة بعد ما كان بيروح الشغل بعجلة..شكرا للمسلمين.
قسيس عبيط..لا عنده حضور ولا علم..وشعب الكنيسة أساسا ما بيسمعلوش..يقوم المسلمين يحولوه لأشهر قسيس بيواجه المسلمين..ويروح كل دول العالم يلم تبرعات لدعمه..ويتحول لبطل فضائيات ومرتبه بمئات الآلاف بعد ماكان آخره كنيسة محلية تعينه بأكله وشربه وسكنه..شكرا للمسلمين.
في أمريكا مرة قسيس عبيط قالي أنا هاحرق القرآن وده حقي..قلتله والله شكرا..احنا لما المصحف عندنا بيقدم ويتقطع بنحرقه عشان حرام نرميه في الزبالة..قولي هتحرقه امتى وانا آجي احرقه معاك..الراجل سابني ومشي بعد ما كان فاكر أني هاتخانق معاه واحوله لأيقونة لحرية الرأي ويروح يلم تبرعات على حس تهديداتي له.
المسلمين ساعات بيكونوا أشد أعداء أنفسهم بعمل وزن للحثالات اللي بيشتموا رسولنا وعقيدتنا..مع إن الأساس في الدين اننا نطنشهم تماما ونخليهم يموتوا بغيظهم..والحوار فقط مع الأشخاص اللي بيتحاوروا عشان الوصول للحقيقة مش للإساءة.
احنا بنتعبد لله بآيات بتتناول كل أنواع الشتائم والإساءة اللي توجهت للرسول صلى الله عليه وسلم..وما حذفناش الآيات اللي بتقول “ويقولون كاهن” و”يقولون ساحر” و “يقولون تقوله”..يعني عندنا في القرآن لستة بكل التهم اللي اتهموا بيها بالرسول..يعني أنت ما جبتش حاجة جديدة..وانت ما فاجأتناش بأي شئ..وعشان كده مش هنعمل منك شخص مشهور ومش هنرد عليك أساسا..إلا لو كنت عاوز تتعلم مش تتهكم..
ايه اللي هيضر الرسول لو خنزير شتمه؟ ايه اللي هيضر القرآن لو شخص مختل حرقه؟ هوا أنت لو وقفت في الشمس وقعدت تشتم الشمس..تفتكر هتكون أهنت الشمس ولا أثبت لكل انسان شافك وسمعك أنك أحمق؟
لا تجعلوا من الأحمق نجم وبطل..أميتوهم بالسكوت وهما هيموتوا بنفسهم.ما تعملوش للخنزير سعر