الأسبوع الماضي الرئيس الروسي قال إنه بيتوقع انخفاض التضخم في 2023 مقارنة ب 2022. نفس الكلام قاله الرئيس التركي اللي توقع تسارع وتيره انخفاض التضخم. وللي ميعرفش تركيا التضخم وصل فيها في أحد الشهور لأكثر من 80%… وفي مصر الخبراء بيتوقعوا إن التضخم هيقل اعتباراً من الربع الثاني (أبريل وطالع)… فمنين أخبار حلوه زي انخفاض التضخم بتيجي مع وجود تأكيدات عالمية إننا في أزمة صعبة؟
في البداية ايه هو التضخم؟ باختصار كده وببساطة هو ارتفاع الأسعار في فترة زمنية وهى سنة عادة. وهو يقاس بمجموعة سلع لكن لو فرضنا إنه سلعة واحدة مثلاً سعرها 100 جنية في يناير 2022 ولقيتها في يناير 2023 بقت 125 جنية يبقى كده التضخم 25% في السلعة دي.
في تفاصيل كثير للتضخم وفي مؤشرات بتقيس تضخم السلع الغذائية وفي تضخم أسعار الإسكان وتضخم الخدمات ووو. لكن خلينا نمشي في المثال إن التضخم دا منتج واحد بس للتسهيل.
فإزاي بقى التضخم هيقل؟ وهل معنى دا إن الأسعار هتقل أو حتى مش هتزيد قوي؟
نفتكر بسرعة تعريف التضخم. ارتفاع في فترة زمنية… فلو فرضنا في نفس مثالنا فوق السلعة ب 100 بعد سنة بقت 125 جنية يبقى كده تضخم 25%… طيب السنة اللي بعدها السلعة زادت تاني 25 جنية؟ هنا بقى سعرها 150 جنية والسنة اللي قبلها 125 جنية يبقى تضخم 20%… يعني نفس الزيادة 25 جنية مرة قالوا تضخم 25% والسنة اللي بعدها بقت 20%.
طيب تخيل السنة التالي زادت برضك 25 جنية وبقت 175 جنية… 175/150 يبقى عندي تضخم 16.6%… زادت السنة اللي بعدها 25 رابعة وبقت 200 جنية… يبقى 200/175 يبقى 14% تقريباً…
لما تجمع أرقام التضخم في ال 4 سنين دول هتلاقيهم 75% بينما السلعة زادت من 100 ل 200 يعني مفروض 100%… هنا الخدعة بقى.
نرجع بقى للوضع المصري… يناير وفبراير 2022 كان الدولار 15.5 ودلوقتي الدولار ب 30 جنية… فلما نقيس التضخم في يناير فطبعاً الرقم كبير… في مارس 2022 حصل ارتفاع للدولار ل 19 جنية والجمارك اتقفلت فالأسعار زادت في مصر من مارس 2022 وفضلت تزيد مع الحرب الروسية اللي بدأت نهاية فبراير ثم ارتفاعات الدولار.
فمن أبريل هتبقى المؤشرات بتقيس على أساس سعر مرتفع من الأساس في 2022… فاكرين لما بدأنا نقسم على 125 ثم 150 … فعشان كده التضخم هيقل. مش عشان زيادة الأسعار قلت… لو الأسعار فضل تزيد بنفس أرقام الزيادة. فالتضخم هيقل عشان المقام في القسمة هيزيد.
توضيح أخير:
التضخم هو زيادة الأسعار؛ فمعنى انخفاض التضخم يعني انخفاض معدلات ونسبة زيادة الأسعار… في ناس تسمع انخفاض التضخم تقول إزاي والأسعار بتزيد… مهي لازم تزيد… الأسعار تقل يعني تضخم سالب.