المكسيك دولة لما حد يجيب سيرتها؛ نفتكر الأفلام الأمريكية وعصابات المخدرات؛ أو التاكوس والأكل الحراق.
المكسيك عالورق دولة كبيرة قوي؛ عندها صناعة سيارات مهولة وحجم انتاج السيارات في المكسيك تجاوز 3 مليون سيارة سنويا ودا يخليها رقم 7 بعد المانيا مباشرة
المكسيك عندها مصانع بتورد قطع غيار لأبل؛ بل كمان في مفاوضات لبناء مصانع لبيجاترون وفوكسكون لتجميع أجهزة أبل بالمكسيك.
كارلوس سليم يعتبر رقم 10 في أثري أثرياء العالم ودا مكسيكي.
صادرات المكسيك الشهرية 50 مليار دولار؛ ودا أد صادرات مصر من جميع السلع بترولية وغير بترولية في أفضل سنة تصدير بتاريخ مصر وهي 2022… يعني صادرات شهر في المكسيك ب سنة في مصر.
اه السياحة صحيح؛ المكسيك رقم 2 او 3 في عدد السياح ؛ أكثر من نصف الرقم من أمريكا بس… أكثر من 50 مليون وساعات 60 مليون بيروحوا المكسيك سنويا.
المكسيك موجودة في مجموعة ال 20 الكبار أو G20 اللي هما أكبر اقتصاد في العالم… حجم الناتج المحلي بتاعها يفوق اندونسيا وهولندا والسعودية.
حلوه المكسيك صح؟ أهو رغم كل ما سبق فالتقارير بتتكلم ان 44% من الشعب المكسيكي تحت خط الفقر العالمي (3.75 دولار في اليوم)
تجارة المخدرات والسلاح والعشوائيات منتشرة بشكل مهول في المكسيك؛ والكل عاوز يهرب ويروح أمريكا… واللي تابع أخبار حرب العصابات الأسبوع الماضي لما البوليس قبض علي ابن (إل شابو) فالعصابة بتاعته احتلت مطار المدينة وحاربت الشرطة والجيش.. وخطفوا طيارة… وبالمناسبة عملوا دا في 2019 لما اتقبض عليه وقتها وأجبروا الحكومة تفرج عنه.
يعني البلد اللي فيها 10 أغني رجل في العالم ومصانع أبل ومصانع سيارات من كل الكوكب و3 أكثر بلد بييجي لها سياح؛ نص شعبها فقير.
دا لإن مفيش علاقة بين وجود مصانع وتقدم وبين فقر الشعب. تحسين وضع المواطن مش هيتم بس بوجود مصانع وصناعة وتصدير وسياحة… لازم يكون في قوانين تحمي المواطن من الرأسمالية الصرفة…
في غياب القوانين؛ عادي الشركات هتشتغل وتدي العمالة ملاليم وتطرد اللي مش عاجبها؛ وبمساعدة الفساد هيتهربوا من الضرايب ويقللوا الجودة بحيث يبعوا لك الزبالة؛ أقل جودة بأعلى سعر ويحققوا أرباح خزعبلية.
بس يا سيدي ودي قصة المكسيك؛ مكان عاملة رجال الأعمال الأمريكان والغربيين بحيث يقدروا يحققوا أرباح مهولة منه دون أي التزامات نحو مواطنين وحقوق انسان ووو… يقدروا يرموا فتات للعمالة؛ بس لو في بلادهم عملوا كده فالقوانين هتضرهم جداً… لكن في المكسيك لا.
المهم وجود القانون؛ والأهم تنفيذ القوانين عالجميع.