شايف صورة البوست دي؛ دا تاريخ الذهب مع الدولار آخر 20 سنة للجرام وليس الاوقية… تلاقي حد يقولك تخيل لو كنت اشتريت الذهب في 2002 (النقطة 1) وبعت بعد 10 سنين في النقطة 2 تخيل كنت كسبت 6 أضعاف فلوسك… صح عندك حق؛ طيب هو انتا مكشوف عنك الحجاب يعني وتعلم الغيب عشان تصطاد النقاط 1 و 2
طيب اللي شاري في 2 بس؛ اه مهو انتا بتقول لو كنت بعت في 2؛ تخيل انك الطرف الثاني يعني حد اشتري في 2002 وباعلك في 2012… وانتا شاري سعر 60 دولار… ايه اخبار شعورك بعد 10 سنين والجرام دلوقتي ب 56 دولار
طيب ليه تكسب 6 اضعاف… عارف لو كنت اشتريت سهم أبل في 2002 كان بكام؟ ب ربع دولار ودلوقتي السهم ب 148 دولار يعني كام زمانك كسبان 592 مرة فلوسك؟
ومش شرط أبل؛ غمض عينك واي شركة مشهورة دلوقتي لو كنت اشتريت سهمها من 20 سنة كان زمانك ثري جداً… بس السؤال هو انتا كنت هتعرف منين ان سنة 2022 الشركات دي هتبقي بالحجم دا
يعني انتا في 2002 وهتشتري سهم شركة تكنولوجيا؛ هتفكر في نوكيا ولا بلاك بيري وموتورلا؛ او تفكر في شركة كوداك.
ولو كنت انتا عفريت وفكرت في شركة مشهورة وقتها ليكن Intel فكنت هتشتري سهمها ب 30/35 دولار وبعد 20 سنة تلاقيه 30 دولار برضك؛ ولا تشتري IBM ب 110 دولار وبعد 20 سنة تلاقيه ب 150 دولار… يمكن الاستثناء الوحيد هو مايكروسوفت كنت هتشتريه ب 25 وتلاقيه دلوقتي 250 يعني لو شاطر فحت كنت هتصطاد سهم يعمل 10 اضعاف.. بينما ابل عملت 600 ضعف وأمازون 93 ضعف.
فاللي تلاقوه حاطط النوعية دي قولوا له شاطر؛ قولنا ايه نشتريه دلوقتي وبعد 5 سنين نبقي كسبانين قوي ونبقي احنا اللي بيتضرب بينا المثل؛ ومش هيرد عليكم… لان دي امثلة وهمية… ممكن كنت تشتري الذهب في اعلي قيمة في 2012 وتفضل خسران ل 2022 يعني 10 سنين تبقي فلوسك خسرانه 9 سنين منهم…
طبعاً ما سبق كله حديث عن الدولار لان الجنية بره اللعبة؛ كده كده انتا خسران بالجنية الا لو بتلعب بالشهادات البنكية وربنا معاك بقي. لكن الجنية لوحده خسران عالمدي الطويل قوي وحالياً خسران طويل وقصير كمان شكله..وربنا يقومه بالسلامة عشان مبقاش وضعنا مستحمل
كمان مرة انتشار بوستات من نوعية (عارف لو كنت حطيت فلوس في مش عارف ايه في تاريخ كذا كان زمانك كسبت كذا).