من أوئل الكلمات اللي هتقابلك في مرحلة انتقالك من الوظيفة للبيزنس
إنّك هتسمع حدّ بيقول لك ( اعمل بذكاء – وليس بجهد )
أو work smarter – not harder
وهتلاقي عشرات الكوميكات على الموضوع ده
ما تعرفش ليه كلّ الناس بتسمع الجملة دي بشكل – لكن بتفهمها بشكل تاني !!!
يعني !!
رغم إنّ كلّ الناس سمعت الجملة بتقول ((((( اعمل ))))) بذكاء
إلّا إنّ كلّ الناس بتفهمها بمعنى ( لا تعمل )
تفسيري الشخصيّ على الموضوع ده هو إنّ الناس بتكون كارهه العمل أصلا
فما بتصدّق تسمع نصيحة ضدّ العمل – تقوم مترجمة النصيحة للحاجة اللي همّا عاوزين يسمعوها – مش الحاجة اللي النصيحة عاوزة تقولها !!
النصيحة بتقول لك ( اعمل ) بذكاء
يعني إنتا ما زلت هتعمل
والنصيحة ما قالتلكش ( لا تعمل بجهد )
النصيحة قالت اعمل بذكاء
قد يكون العمل بذكاء ده هيكون عمل بجهد بردو – إيه المانع ؟!
وقد يكون العمل بذكاء ده هيتطلّب جهد أقلّ – إيه المانع بردو
وقد يكون العمل بذكاء ده لا يتطلّب جهد خالص – مين قال كده بقى ؟!!!
لحظة واحدة !! اقفش هنا لحظة لو سمحت – مين قال لك كده – حضرتك فهمت كده منين ؟!!!
أرجع تاني وأقول لك – ما فيش حاجة تؤدّي للفهم ده
الحاجة الوحيدة اللي تؤدّي للفهم ده هو إنّ الإنسان يكون أصلا كاره للعمل – فبيترجم النصائح طبقا لما يريده هو – لا طبقا لما تريده النصيحة
التفسير الوحيد للفهم البعيد ده عن المقصود من النصيحة – هو إنّ الشخص اللي فهم غلط ده كان ((((( عاوز يفهم غلط )))))
كان محتاج يفهم غلط
كان عاوز يعمل حاجة غلط – ومستنّي أيّ حدّ يدعمه في الغلط ده – فلمّا يسمع نصيحة قريّبة من خياله – يقوم مترجمها للّي هوّا عاوزه
أقول مثلا احترس بشدّة لإدارة عملك في وقت الأزمة – فألاقي حدّ بيقول ( أنا بردو قلت كده – المفروض الواحد يتوقّف عن العمل في وقت الأزمة لحين اتّضاح الرؤية – شكرا على النصيحة يا باشمهندس )
اللي قال نصيحة اعمل بذكاء – كان يقصد إنّك تشتغل بالطريقة الأقرب لتحقيق الهدف
ما تضيّعش وقت في مهاترات ومحاولات فاشلة لإنّك عاوز فقط تستمتع بالتجربة
استعين بالأتمتة في شغلك – ما فيش داعي تكرّر نفس الجهد كلّ مرّة
ارمي المهام البدنيّة على الموظّفين – وتفرّغ للمهامّ الذهنيّة
اعمل تفويض للموظّفين – وما تشتغلش بطريقة الوان مان شو
اجتهد إنّك توصل لطريقة من طرق الدخل المحايد – بحيث يحصل تدفّق نقديّ لشركتك لا يستدعي تواجدك في كلّ عمليّة بيعيّة
اعمل ده – هوّا دا العمل بذكاء – لكن ما حدّش قال لك إنّ ده هيحصل لوحده بدون جهد !!
طبعا أخطر ضحايا المقولة دي همّا الناس اللي بيتوجّهوا للسمسرة !!
هوّا فيه ذكاء أكتر من كده
تقعد في بيتكم وتبيع حاجة من طرف ( أ ) لطرف ( ب ) وتاخد عمولة
آهو دا العمل بذكاء ولّا بلاش
فدا اللي خلق عندنا طبقة من الطفيليّين اللي ما بيقدّموش أيّ قيمة – وكلّ اللي عندهم إنّهم يقولوا لك إحنا هنعمل أبليكاشن يوفّر خدمة الكذا للناس اللي محتاجينها
ويرجعوا يتصدموا بعد كده إنّ الناس بتبحث عن الوصول لمقدّم الخدمة بشكل مباشر
ما هو طبيعيّ طبعا – وأنا ليه اتحمّل عمولة لكائن متطفّل وسيط بيني وبين البائع ؟!
يا أحباب – اعملوا بذكاء – التزموا بالكلمتين ( العمل – والذكاء )