غني بالحلال

تقدر تكون غني بالحلال مافيش تعارض والله -الطريق الملتوي ممكن يوصلك انك تعمل فلوس لكن مش هو الطريق الوحيد
تقدر تنجح في شغلك وتوصل لأعلى المناصب وبالحلال وباجتهادك وسعيك وذكائك مش شرط تكون منافق أو متملق أو راشي – صحيح ده طريق سهل لكنه مش الطريق الوحيد اللي يوصلك للنجاح
الاختيار ليك ومافيش طريق واحد مجبورين عليه علشان نوصل لحلم أو هدف معين – أحيانا كتير الطريق الحلال أصعب وفيه مشقة بس أمتع بكتير وفيه سعادة في الدنيا والآخرة

الشهرة مش دليل ولا شرط للنجاح أو التميز أو التأثير في الناس – هى وسيلة مش أكتر وفرق كبير انها تكون عندك وسيلة من الوسايل وانها تكون هدف ليك
فرق كبير لما تلاقي نفسك بتفرح علشان واقف قدام عدد كبير من الناس أو معروف وسط الناس ولما تلاقي نفسك همها وهدفها انك توصل المعلومة اللي عندك لأكبر عدد من الناس ومش مشكلة ان حتى اسمك يتذكر

تقدر تنجح وتتوفق في فرص كتير وانت بتشاركها لزمايلك واى حد ممكن يستفيد منها عادي – مش شرط تداري وتخبي – ممكن تجيلك فرصة شغل انت مقدم عليها او منحة نفسك فيها وانت برضه بتساعد زميلك واى حد تعرفه انه يقدم في نفس الفرصة – والله ما هتخسر – لأن اللي ربنا كاتبهولك هتاخده مهما حصل فخد بإيد غيرك وانت بتطلع السلم مش هتضيع منك الفرصة والله لو ربنا كاتبهالك

لو عندك يقين بربنا بجد وبصدق مش هتتردد ولا لحظة انك تساعد غيرك أونك تفكر تحبس علم أو معرفة عندك

الاختيار دايما ليك – انت مش مجبر على طريق تمشي فيه – وهديناه النجدين
لو عشت بيقين صادق مع ربنا هتحس بطمأنينه مصاحباك طول حياتك مش هتعرف توصلها إلا باليقين

https://www.facebook.com/asmaa.m.noureldin/posts/10154448696509001