لما بتتجهد فى اى حاجة وبتسعى وبتتوكل على الله
هتلاقى فى بداية اى حاجة “خاصة لو جديدة”بعض المشاكل…
خاصة من الناس اللى حواليك:
– لا متعملش كده
– مش كل مرة تسلم الجره
– احنا الحمدلله اننا عدينا باللى فات
– كفاية لحد كده متبقاش طمّاع
– هاتفتح على نفسك فتحة انت مش قدها
– يا حيطة دارينى
– طيب علشان الحسد
– انت مشفتش ابن “مش عارف مين” لما عمل زيك وبرضه منجحش
– طيب استنى شوية
– فى العجلة الندامة
– انت الموضوع غيّرك
لو انت بتجتهد وبتاخد بالاسباب صح ..كمل ومتوقفش
طيب “العلامات” اللى هاتحس انها بتقابلك “علشان متكملش”؟
فى الاغلب دى مش مبعوتة ليك ..كمثال:
لما تكون جايب مجموع كبييير فى “خلاط” الثانوية العامة .. وتلاقى مثلا ولدك بيقولك اختار تخصص معين ..وانت بتكره التخصص ده وعايز تختار تخصص تانى
لو انت اجتهدت فى ثانوية عامة ونجحت وجبت تقدير… وقادر ومقرر تجتهد فى المجال اللى انت هاتختاره ..يبقى كمل عليه …الموضوع هايختلف تماما بعد ما تكمل فى الحاجة اللى انت عايزها
والحاجات اللى هاتفتكرها بعد ما تنجح فى اللى انت عايزه …هتلاقيها كانت مبعوتة لوالدك مش ليك
انت ثابت فى اى موقف .. بس هتلاقى الناس بتختلف على حسب الموقف
– والدك فى الثانوية العامة
– صحابك/ ابن خالتك فى بداية الشغل
– مديرك بعد شغلك بفترة
لو سمعت كلام اى حد منهم متلومهمش ..هما متعلموش من اللى فات ..انت اللى عملت حاجة مختلفة ..ولازم تحافظ عليها .. وفى نفس الوقت متحزنش ..لانك مش عارف الخير فين
فى حاجات تصميمك عليها هاينجحك .. وفى حاجات الطريق اللى اتحطيت فيه هو اللى هاينجحك ..لانك فى الاخر مبتنجحش علشان انت شاطر ..لان اغلب الناس اللى اعتمدت على شطارتها “فشلت”..
انت بتنجح علشان سعيت + اخدت بالاسباب + توكلت عليه
لَا تَدْرِي لَعَلَّ اللَّهَ يُحْدِثُ بَعْدَ ذَلِكَ أَمْرًا
#لسه_فى_امل