ياريت يا جماعه الله يكرمكوا بلاش ناخد ايات ربنا ونقعد نلويها عشان تيجى على مقسنا, ياعنى ربنا بيقول “وَلِتُصْنَعَ عَلَىٰ عَيْنِي ” ده كلام متوجه بشكل مباشر لسيدنا موسى لتجهزية للنبوة, ملوش اى علاقة انك سقط فى الجامعه عشان ماذكرتش فاتتوهم انك بتتصنع عشان تبقى عالم كيمياء, او انك خرجت من علاقة فاشلة فى الاغلب انت كنت الطرف الاغبى فيها فا انت بتتصنع عشان هتتجوز احسن شخص فى كوكب زمردة
ولما ربنا يقول “الطَّيِّبَاتُ لِلطَّيِّبِينَ ” ده كان خطاب موجه فى حادثة الافك ان الكلام الطيب للرجال الطيبين, ماتعملهش بقى قانون انك عشان طيب او طيبه يبقى هتتجوز حد طيب , عادى جدا كلنا شوفنا بنات طيبين وقعوا فى رجاله زى المسيخ الداجال و رجاله طيبين وقعوا فى بنات زى مراة ابو لهب , عادى بتحصل الموضوع اكبر من الطيبه الموضوع داخل فى عقل ومشاعر و حسابات منطقية وتوافق وسعيد اردغانة و توفيق العنخ وليلة كبيرة اوى ساعدتك
-لما ربنا يقول ” إن هؤلاء يحبون العاجلة ويذرون وراءهم يوما ثقيلا” ده كلام نزل فى يهود مكة على كتمانهم لصفات نبوه محمد , فا مينعفش تشوف اتنين اصحابك قاعدين بشربوا شيشة او بنت لبسها مش عاجبك تقول عليهم الايه ديه ده اسمه عجن رهيب و دماغك كده يامان out of date بكلمك بامانه
عموما ياريت نتعامل مع ايات ربنا بفهم عشان نسريح وماتضيعش عمرك فعلا فى اوهام انت مالفها من دماغك و جايب شوية كلام من صفحات على الفيسبوك او من قعدات كلها هرى و عجن وناس فهمها عن الدين زى فهم محمد رمضان عن الفيزياء النووية