خارج سرب الحريات المطلقه

للأسف مضطر اغرد خارج سرب الحريات المطلقه وترند انت حر مالم تضر، الحريات الغير مشروطه بقيد ديني أو مجتمع

لو انت غير مؤمن بالأديان وشايف الرسالات السماوية حاجه لطيفه كانت نازله لناس عايشين في خيم عشان يتمدينوا ويبطلوا يؤدوا البنات بهمجيه، بس دلوقت احنا برنسات ومش محتاجين غير نظام ios قوي ينظم الحياه والعلاقات .. ف آسف اني ضيعت وقتك ف السطور اللي فاتت

اما لو انت ارتضيت وجود إله ومنهج سماوي وقيود حقيقيه تحد من الانفلات البشري الطامع لكل شهوه ولو علي حساب ابادته، ف لازم تعرف ان الدين راعي الضعف البشري.. هو قلم أظافر الشهوه المنفلته… بينلك الحلال وحطلك علامات و alarm علي المشتبهات وادي مساحه الحريه وغض الطرف عن زلاتك

لو غلطت ليك توبه..
واوجب الستر علي نفسك و عليك لو حد شافك
ومنعك من الجهر.. وأوصى المجتمع بردعك لو جاهرت
“تأمرون بالمعروف.. وتنهون عن المنكر”
“كانوا لا يتناهون عن منكر فعلوه.. لبئس..”

اه مفيش حاجه اسمها انت حر طالما مجتش جنبي
لان المجاهره تمييع.. وفتنه لاي حد قلبه ضعيف وواقف علي شفا جرف منحدر

قلعتي الحجاب.. انتي حره.. وبينك وبين ربنا،
كتبتي بوست عن شجاعه قلع الحجاب.. المبدأ اتغير ومراجعتك واجبه.. بدون اتهام او تضييق او تخوين ولا إهانه لان دا مش دورنا.. المجتمع مش جهه تنفيذيه للحكم علي حد… لكن الغلط هيفضل يتسمي غلط ولو عمله كل الناس

الحجاب.. الميراث.. المثليه.. وغيرها
الثوابت اللي كانت معلومه من الدين بالضروره بقت محل جدل وشك

للفرد دور في البحث عن الحق
للمجتمع دور في الستر علي المخالف.. وردعه ببيان الحق لو جاهر عن جهل، بدون صدام بدون تحقير من شأنه ولا تنظير… كلنا ف الوحل زي بعض

لرجال الدين دور في بيان الحق والرد العلمي الممنهج.. الناس من حقها تسال وتعرف

هل عشان انا وحش وبغلط مش مفروض اتكلم
لا قول.. انا بغلط بس مش هشرعن الباطل
دا غلط وانا نفسي ضعيفه.. عادي

الحريه موجوده.. بس مش مطلقه
واستشراف الدعوه للباطل تحت مظله التريند وتلبيس الدين علي الناس بجهل او طلب للشهره باب فتنه كبير

فانا بسجل اعتراضي علي كل غلط ولو اترفعت ليه الرايات.. ولو كان اللي رافعها صاحبي وانا اقل منهم شأنا

وربنا يسلم الجميع من فتنه الرضا والسكوت الموجب للسخط العام..

والزمالك قادم برضه

https://www.facebook.com/wesam.fawzy1/posts/10209944213509492