في اكثر من بوست بيتكلم عن ازاي تقدر تساعد #فلسطين الكترونيا
https://www.facebook.com/samiralazazy/posts/1981615388657964
اغلب البوستات دي بتأكد علي عدم كتابة الهشاتاجات الكتير، وبما ان في ناس كتير ممكن تكون مش مقتنعة بالفكرة، فخلينا نوضح ايه فكرة انتشار الهشاتاجات وليه كتابة الهاشتاجات الكتيرة مضر؟
فكرة الكتابة في هاشتاج “في الاصل” هدفها الاساسي تجميع للتويتات (لانها في الاصل بدأت علي تويتر) وبعدها الانتشار،
فمثلا لما يبقي فيه ناس كتير عايزة تتكلم عن نفس الموضوع، وبما ان تويتر عمره ما كان فيه اكثر من مكان مختلف الناس تتواصل عليه في مجموعات مع بعض (عكس الفيس بوك اللي فيه صفحات و جروبات)
فالناس كانت بتكتب عن نفس الموضوع من خلال (الهاشتاج) ومع كثرة الكتابة في نفس الهاشتاج بيحصل الانتشار واللي بيخلق مفهوم “الترند”
و الموضوع ده مختلف (الي الان) بين تويتر وباقي المواقع
لو بتتفاعل علي تويتر وكتبت الهاشتاج، وكذا حد كتب عن نفس الهاشتاج، الهاشتاج ده هايبقي ترند في المكان/المحافظة اللي انت فيها، ولو عدد الكتابات/الناس اللي بتكتب في نفس الهاشتاج زاد، وكمان بقي في كذا حد من اكثر من مكان، هايصبح ترند في البلد/الدولة كلها، ولو زاد اكثر هايبقي الموضوع من الاكثر تداولا في العالم وكل الناس ينفع تشوفه بمجرد ما تدخل تويتر.
واما لو بتتفاعل علي الفيس بوك، فالموضوع اقرب اللارشيف منه للانتشار/الترند، يعني لو كتبت مهما كتبت في الهاشتاج ده، مفيش مكان في الفيس بوك هايعرف الناس بالحاجات الاكثر تداولا (زي ما موجود في تويتر)، فالاستخدام الاشهر للهاشتاج في الفيس بوك بيبقي انك لما تكتب حاجة تقدر تشوف مين اللي كتب فيها؟ وكتب فيها ايه؟ فالموضوع يتعبر توثيق اكثر منه انتشار
ازاي فكرة الهاشتاجات ابتدت ؟
في البداية كان بيبقي فيه شخص/مجموعة اشخاص/ شركة او كيان بيقرروا انهم هايكتبوا عن موضوع/حدث/فكرة/ او حتي اعلان/دعاية لحاجة معينة، وبيختاروا ليهم (كلمة او اكثر) تبقي هي الهاشتاج الخاص بيهم،
اول ما كذا شخص بيكتبوا “معلومات” عن الهاشتاج وكتاباتهم بتروح لمتابعيمهم، ويبدؤا (المتابعين) يعيدوا نشر الكلام و كمان يكتبوا في نفس الهاشتاج، بيبتدي يوصل لناس اكثر سواء بانه يبقي ترند نتيجة كثرة التفاعل (تويتر) او نتيجة ان لما شخص يشوف الهاشتاج ويدخل عليه فيشوف كل التفاصيل اللي مكتوبة فيه ويعرف عنه من كل الناس اللي كتبت فيه (ودا بيتم حاليا علي اغلب مواقع التواصل الاجتماعي)
ازاي تطور الموضوع للكتابة في اكثر من هاشتاج؟
خلينا نفترض ان في هاشتاج انتشر (بالطريقة اللي قلناها) وبقي في ناس بتتكلم عنه،
فبيدخل شخص مثلا يكتب حاجة وبكتب في اخرها الهاشتاج المنتشر بحيث يوصل للناس اللي بتكتب وتتابع الموضوع ده، وبعدها كان ممكن يكتب معاه هاشتاج جديد مثلا هو حابب ينشره،
في الاول كان الموضوع بيقي ليه علاقة الهاشتاج الاصلي المنتشر، وبعدين بقت الناس بتكتب عن حاجات ملهاش علاقة الهاشتاج المنتشر ، و وصولا لناس بتكتب في كل حاجة كل الهاشتاجات اللي الناس تعرفها بهدف انها تظهر لاكبر عدد من للناس اللي بتتفاعل مع الهاشتاجات المنتشرة، ولكن كان المشترك انهم بيكتبوا هاشتاجات متنوعة (وعليها) ناس، علشان يوصلوا للناس، مش بيألفوا الهاشتاجات من دماغهم، لان ساعتها الهاشتاج اللي مفيش ناس بتتكلم عليه ملوش اي معني او افادة
– طيب ليه الناس بتقترح عدم الكتابة في هاشتاجات كتير جدا؟
الموضوع ده مش مفيد انك تستخدمه لاكثر من سبب
١- الـ Algorithms او الخوارزمات الخاصة بأي موقع اجتماعي لما بتلاقي محتوي كتير بيكتب بنفس الطريقة (كوبي / بيست) بتكرار كتير في وقت قليل، بتعتبر دا سبام، لان اغب الـ Spammers بيبنوا Bots بتعمل الفكرة دي، مجرد بوت متبرمج انه ياخد نفس الكلام كوبي بيست بشكل متكرر جداااا
فلما الاشخاص بيتصرفوا نفس تصرف الـ Bots فدا بيقلل من انتشار – واحيانا حظر – الكلمة/الهاشتاج من علي الموقع
٢- فكرة انك تكتب في اكثر من هاشتاج بنفس المعني مش بتحقق هدف الانتشار – دي بالعكس – بتقلل فرص انتشاره، ازاي؟
هانتفرض اني هاكتب اكثر من هاشتاج (حي الشيخ جراح – انقذوا حي الشيخ جراح – الشيخ جراح – انقذوا الشيخ جراح )
هنا في مشكلتين، الاولي ان مش كل الناس هاتكتب في نفس الهاشتاجات دي (بنفس الهمزات والتفاصيل بينهم لو فيها underscore او اكثر واختلاف اماكنها)
وبالتالي في حاجات هاتكتبت في كل هاشتاج منهم مش هاتظهر ومش هاتتشاف غير للناس اللي هاتدخل علي الهاشتاج ده بس، فبالتالي مش كل الناس هايبقي عندها كل/نفس المعلومات، لان مش كلهم هايتوفر لهم نفس الوقت يبصوا في كل الهاشتاجات دي
انا كنت وضحت ازاي الكتابة باللغة العربية ممكن يفرق فيها كتابة الحروف والهمزات في انها تخلق اكثر من هاشتاج لنفس الفكرة
https://www.facebook.com/kareemsamara/posts/10158147046888106
والمشكلة التانية، ان فرص ان الهاشتاج يبقي ترند هاتقل جدا،
لان لو في 10 الاف شخص كل مجموعة منهم بتكتب في هاشتاج مختلف، هايبقي عدد البوستات في كل هاشتاج قليلة، ودا هايختلف عن ان نفس العدد يكتب في هاشتاج/هاشتاجات محددة، ففرص ان كل فترة مجموعة تبقي عارفة الهاشتاج وتكتب فيه هايزود فرص انه يبقي ترند ويظهر لناس اكثر او يتجمع فيه كل الحاجات ويسهل لاي حد يوصلها،
حتي اللي حابب يتابع كل فترة بمجرد ما يدخل علي الهاشتاج المعروف هايقدر انه يفهم ويتابع كل حاجة لان كل التفاصيل بتتكتب في المكان ده
فرجاء من الناس اللي بتكتب الهاشتاج بكل لغات العالم في كل بوست، او الناس اللي بتكتب نفس الهاشتاج كوبي بيست في اكثر من تعليق علي نفس البوست، او اللي بيكتبوا نفس الموضوع باكثر من طريقة يقللوا استخدام الطرق دي لان ضررها اكثر من افادتها.
ممكن تكتب في اكثر من هاشتاج لما يكونوا مختلفين مثلا زي
#GazaUnderAttack#savesheikhjarrah#FreePalestine
ولو عايز تجرب طرق مختلفة،
ممكن تكتب/تحتفظ بنوت فيها بعض التعليقات/المقولات/التواريخ او اي حاجة مرتبطة بالقضية، وتبقي تاخد كل مرة حاجة منهم كوبي بيست مع كل حاجة تنشرها، بحيث ميبقاش الموضوع متكرر.
ممكن تستفاد من فكرة الـ Cross-posting او عملية نقل المحتوي بين مواقع التواصل الاجتماعي المختلفة
خد مثلا بوست مكتوب علي تويتر وانشره كصورة علي فيس بوك (زي مثال البوست ده) واكتب معاها الهاشتاجات
حمل فيديو من snapchat وارفعه علي اليوتوب (او العكس)
خد فيديو من تيك توك وارفعه علي انستجرام (او العكس)
حاول علي قد ما تقدر في كل مرة هاتنشر/تكتب عن الهاشتاجات تنقل/تضيف معلومة جديدة/تاريخية/مختلفة متعلقة بالموضوع،
الطريقة دي هتساعد ان يبقي فيه زخم معلومات عن القضية في كل المواقع بتفاصيل كثير هتساعد الناس انها تعرف اكثر، بعكس انتشار الهاشتاجات من غير اي محتوي
حاول تشوف مواقع (موثوق فيها) بتتكلم عن القضية وخد منها الكلام وانشره في اي موقع
اعمل تصميم او فكرة حتي ولو بكتابة الهاشتاج بطرق مختلفة ونزلها كتصميم او كفيديو علي كل المواقع
ركز علي نشر معلومات عن تاريخ فلسطين واسامي المدن اللي اتغيرت باسماء تانية
https://www.facebook.com/MohamedFergany.t/posts/10225734268208929
و بشكل عام يفضل انه الموضوع ميزدش عن ٣ الي ٥ هاشتاجات بحيث الناس تقدر تتابع كل التفاصيل اللي بتتكتب من غير ما يحتاج يدور في هاشتاجات كتير جدا علشان يقدر يتابع، وعلشان الهاشتاجات القليلة دي تبقي معروفة ومنتشرة اكثر
وبالنسبة لكتابة الهاشتاجات في التعليقات، فكتابة الهاشتاج مرة واحدة في تعليق واحد كافي انه يوصل البوست لاصدقائك او المتابعين ليك – او في بعض الحالات – يعرف الناس ان في هاشتاج الناس تقدر تخش عليه تشوف التفاصيل بشكل اوضح
ومهم نبعد تماما عن التفاعل مع اي صفحة من صفحات افخاي اردعي والحاجات اللي زيها،
الخوارزميات الخاصة باي موقع مش بتفرق انك بتشتم الشخص او بتمدحه، هي بتقيس انت بتتفاعل معاه او لا،
المعيار الوحيد بالنسبالها هو التفاعل، طالما الناس عاملة لايك للصفحة وبتتفاعل معاها بـ Interaction (حتي ولو angry face) او Engagement زي المشاركة او كتابة التعليقات (حتي ولو شتيمة) فدا بالنسبة للموقع
يعتبر ان الصفحة دي كويسة وبتقدم محتوي مطلوب، فبالتالي هاتنشرها وتوصلها لناس اكثر ، الحل الوحيد هو التجاهل، او الـ Reporting غير كده انت بتفيدهم مش بتضرهم
انا مدرك ومقدر تماما ان الناس اللي بتكتب هاشتاجات كتير بيبقي الموضوع من دافع رغبة في انتشار ونصرة القضية الفلs طينية،
فالبوست هدفه اننا نحاول نبذل المتاح لينا بالطريقة الصحيحة.
ما تستهونش بحاجة ممكن تكون شايفها صغيرة، بس ربك يقدّر وتقلب العالم.