التصنيفات
مقالات الضيوف

سهل جدا رد فعل الناس يسرق فرحتنا

فاكر كويس و اختي صغيرة قبل ما تبدأ تمشي كانت والدتي الله يرحمها كانت بتبقى قاعدة على الكرسي وتشيل أختي و تفرد دراعها و توقفها عن ابعد مسافة و بعدين تسيبها و تفتح دراعها علشان اختي تتمشى و تجيلها. فكانت أختي بتجري عليها و هي مبسوطة اوي لأنها مشيت الكام خطوة دول و والدتي بتحضنها و هي مبسوطة أوي انها مشيت الكام خطوة دول.

منطقيا مفيش حاجة مبهرة في مشي اختي ولا ليها ولا لوادتي لأن الأتنين شافوا ناس كتير بتمشي و بتجري. بس سبب الفرحة كان علشان الخطوات الغير متزنة دي كانت انجاز بالنسبة لأختي لأنها اول مره تمشي و انجاز لوالدتي لأنها عارفة انها اول مره تمشي.

لما بنكبر و نعمل حاجة هي بالنسبالنا انجاز في نطاق ظروفنا. بنفرح نفس الفرحة دي لأننا عارفين احنا عملناها في ظروف ايه. رغم ان اللي عملينه بنكون عارفين انه يعتبر اي كلام بالمقارنة بحاجات ناس تانية سبقتنا و عملتها.

فلازم منتوقعش رد فعل فرحان و منبهر من الناس على اللي عاملينه لأنهم شافوا أحسن بكتير و مش هيكونوا دارسين قصة حياتك علشان يعرفوا ان ده أنجاز بالنسبالك. لأن سهل جدا رد فعل الناس يسرق فرحتنا باللي عاملينه. فأفرح باللي انت انجزته و متهتمش برد فعل الناس اللي مش عارفين ان ده انجاز بالنسبالك.

https://www.facebook.com/IhabLSayed/posts/1833123760297901