متستغربش لما تلاقي واحد واقف قدام الباب اللي عمله الامير (عبد الرحمن كتخُدا) لقبة و ضريح الامام الشافعي، و بعدين يقولك:
على فكرة التجديدات دي اتعملت سنة ١١٧٦ هجرية،
(دون ان يكون هناك اي تواريخ أو ارقام مكتوبة) !!!
أصل في طريقة اسمها (حساب الجُمّل) بضم الجيم و تشديد الميم، و الطريقة دي ببساطة بتعتمد على ان كل حرف من حروف اللغة العربية بيعبر عن رقم من الارقام .
بس خلي بالك : الحروف العربية المقصودة هنا هي الابجدية بترتيب:
( أ ، ب ، ج ، د ، ه ، و ، ز ، ح ، … )،
و للتبسيط رتبها الناس على هذا النسق:
( أبجد ، هوز ، حطي ، كلمن ، سعفص ، قرشت ، ثخذ ، ضظغ)،
راجع اغنية الفنانة ليلى مراد:
( ابجد هوز حطي كلمن … شكل الاستاذ بقى منسجمٌ ).
بص يا سيدي :حروف اللغة العربية ٢٨ حرفا:
– الحروف التسعة الاولى: تآخد ارقام الآحاد: من ١ ، ٢ ، ٣ ، … لحد ٩
– الحروف التسعة التانية: تاخد ارقام العشرات: من ١٠ ، ٢٠ ، ٣٠ ، … لحد ٩٠
– الحروف التسعة التالتة: تاخد ارقام المئات: من ١٠٠ ، ٢٠٠ ، ٣٠٠ ، … لحد ٩٠٠
– و الحرف الاخير ياخد رقم ١٠٠٠
( انظر الجدول المرفق )
يقوم اللي بيكتب اللوحة التأسيسية للجامع او أي منشأة؛
يكتب بيت شعر أو اكثر، يعدد فيه مزايا البناء و يمدح بانيه،
ثم يذكر كلمة: ( تاريخه ، أو مؤرخ ، أو أرخت، … )
و الكلام اللي يجي بعدها على طول لو حسبناه بطريقة (حساب الجُمّل)، و جمعناه … يطلع لنا سنة انشاء هذا الجامع – بالهجري طبعا – دون وجود اي ارقام !
و هو ما يعرف بالشعر المؤرخ أو الشعر التأريخي.
مثال: بيت الشعر المكتوب على باب ضريح الامام الشافعي اللي جدد عمارته عبد الرحمن كتخُدا، بيقول:
( الله نوَّر مسجداً تاريخهيزهو به إشراق مجد الشافعي ) تعالي بقى بعد كلمة تاريخه، و نحسب حساب الجُمّل:
يزهو = ٢٨
به = ٧
إشراق = ٦٠٢
مجد = ٤٧
الشافعي = ٤٩٢
يبقى المجموع = ١١٧٦
اللي هو سنة تجديد الضريح بالهجري!
الظاهرة دي موجودة في كتير من العمارة الاسلامية، و هي دليل على براعة الشاعر اللي بيقدر يصيغ ابيات شعرية يعبر فيها عن فكرته و كمان يعبر فيها عن تاريخ انشاء المبنى.
للاسف الظاهرة الجميلة دي و اللي كانت موجودة لحد وقت قريب على الجوامع و البيوت و حتى المقابر، اختفت …
و مفضلش غير العرّافين و المشعوذين هما اللي بيستخدموا حساب الجُمّل في النصب!
المراجع:
-على باشا مبارك: الخطط التوفيقية، الجزء الخامس، هيئة الكتاب، عن طبعة بولاق، ١٩٨٦
– محمد كمال السيد: اسماء ومسميات من مصر القاهرة، هيئة الكتاب، ١٩٨٦
– زيارات ميدانية.