ناس كتير قوي بيتكلموا عن
فيديوهات فيفي عبده إللي بتقعد ترقص فيها والفساتين المنفوشة إللي بتلبسها وليه بتعمل كدة وإيه الفايدة..
زي ما هما مستغربين من عربيات محمد رمضان واليخت بتاعه..
والتاتوهات الكتير بتاعة الفيشاوي..
والطريقة السخيفة إللي محمود حميدة بيرد بيها على المذيعين..
وصور الجيم بتاعة عمرو دياب
بصوا.. من غير دخول في متاهات وشرح كتير ممل
الفقرة إللي فاتت مجرد مدخل للكلام ما تقفوش عنده قوي
كلنا بنكبت حاجات جوانا وكلنا عندنا طريقة بتساعدنا إننا نتوازن نفسيًا قدام الناس علشان نقدر نتعامل معاهم من غير ما يكشفوا ضعفنا وعدم الأمان إللي جوانا وعقدنا النفسية والزبالة إللي إحنا دافنينها جوانا..
كلنا بنمارس الحيل الدفاعية، كلنا..
أغلبنا بيمارسها بدون وعي.. بدون تعمد إيصال رسالة معينة..
والأذكياء قوي قوي بيقدروا يستخدموها بذكاء علشان يوصلوا للناس رسايل معينة من غير ما يفتحوا بقهم..
وبينجحوا.. بينجحوا ومحدش بيبقى فاهمهم غير إللي قارئ كويس قوي وفاهم البشر..
لما تشوف حد بيعمل تصرفات غريبة بالنسبالك ومش مفهومة ومبالغ فيها اعرف إنها ممكن تكون حيل دفاعية بيمارسها بوعي أو بلا وعي..
ووراها حاجات كتير قوي مستخبية
دي عايزة تقول أنا لسة حلوة وما راحتش عليا علشان هي بدأت تكبر في السن وخايفة
وده شخص مهزوز فبيعوض ضعفه بعصبيته وبصداميته
وده شخص خجول فبيداري خجله ورا الفاظه القبيحة ونكته الاباحية على السوشيال ميديا
وده حياته كلها بنات وحشيش وعايش في وسط محافظ مش فاهمه ومش متقبله فبروفايله كله قال الله وقال الرسول
وده عانى من مشاكل مادية والفلوس ذلته فلما ربنا فتحها عليه بقى يبين كل ماركات لبسه في صوره ويوريك هو بيلبس منين وبيركب عربيه ماركتها إيه
وده عارف إنه فاشل في شغله وشخصيته تافهة فعمال يقلع ملط ويستعرض في جسمه
ودي عارفة إنها ست مكسورة وضعيفة فمتدارية ورا بوستات السترونج اندبندنت وومان
وده مفيش ولا واحدة بتحبه بجد فعايش دور النسوانجي أون لاين
تصرفات الناس -إللي أغلبنا بيتريق عليها- ساعات بيكون وراها ضعف، ووحدة، وحزن، وبكاء، وعدم إحساس بالأمان، ومرض، وهزيمة، وعقد نفسية، ومشاكل صعبة
تصرفات الناس الغريبة دي أغلبها نابع من الوجع..
لو ركزت ربع ساعة بس.. ربع ساعة والله مش أكتر..
في بصة عينه الدبلانة
ورعشة إيده إللي بيحاول يداريها،
ونفسه المتهدج،
وريقه للي بيبلعه كل شوية،
والـeye contact إللي مش عارف يعمله معاك،
ورجلة إللي بتتهز من تحت التر ابيزة،
وإيده إللي مربعها علشان يداري خوفه
هتشوف فيما وراء الاشياء..
البص على الناس من برة مش ممتع ومعيار كداب..
بص جوة الناس مش عليهم هتشوفهم بجد وهتتعلم..
كل واحد فينا جواه طفل صغير عنده مخاوف وضعف وعدم إحساس بالأمان..
وكل إللي الناس بتعمله ده هوة هوة كلاب علشان تغلوش على العيل الصغير الغلبان إللي جواها ومحدش يكشفه..
كل واحد فينا، عيل صغير بيدور على حب غير مشروط وتقبل من الآخرين زي ما هو بكل نقط ضعفه وعيوبه.. بس محدش لاقي ده
فكلنا بنمثل على بعض