أنا مش من محبي ليفاندوفسكي بشكل عام، وماهواش لاعب أنا أتمنى إن برشلونة يخاطر عشانه في سنه الحالية، بس مفيش أضحك من إن الموقف الحالي يخلي بعض الناس توصفه بإنه
اللاعب اللي “ساب النادي اللي صنع اسمه من أجل المال”
مفيش تفسير لده غير إنهم اتولدوا بعد 2014، أو إن مفيش حاجة بتخلي الإنسان غبي ومنفصل عن الواقع قد غروره وشعوره بالاستحقاق، وإن ما ينطبق على الآخرين لا ينطبق عليه، مجرد محاولة إضفاء طابع عاطفي ع الموضوع والكلام عن الوفاء والولاء والأسطرة هو نكتة شديدة السخافة.
ناهيك بقى بالحقائق اللي حتفضل قائمة سواء قعد أو مشي؛
1- إنت لم تصنع اسم ليفاندوفسكي، ليفاندوفسكي جالك وهو هداف الدوري بعد ما كان مغمور ما حدش يعرفه وماكانش مهاجم أصلًا. في مدرب جابه من بولندا من نادي ما تعرفش تنطق اسمه، حوله من 10 لمهاجم، ونقله من الدكة للتشكيل الأساسي بعد سنين، لغاية ما بقى هداف الدوري، وساعتها انت قلتله أقعد لغاية نهاية عقدك عشان تيجي ببلاش.
2- هو مش سايبك عشان الفلوس، هو سايبك عشان حس بـ”عدم الإحترام” لأنك فاوضت مهاجم دورتموند الحالي لاستبداله، والمفارقة هنا في الاتجاهين؛ من ناحية ليفاندوفسكي مش متخيل إنه اللي حصل لصالحه قبل كده حيحصل ضده دلوقتي، وكأنه كان مصدق إنه ابن الشركة فعلًا، وده شكل من أشكال الغرور والشعور الغبي بالاستحقاق برضه، ومن ناحية تانية، بايرن ميونيخ بيطلب منه كل حاجة طلب منه عكسها من 9 سنين لما مضى معاهم، لمجرد إنهم بايرن ميونيخ، وهم بس اللي يستحقوا الولاء والوفاء والاحترام، ده لو كان في حاجة باقية اسمها وفاء وولاء واحترام في الاحتراف أساسًا يعني.
3- برشلونة معهوش فلوس ليفاندوفسكي يسيبك عشانها أصلًا، بس شيء مبهر إن بعض جماهير بايرن ميونيخ مازال عندها قدرة على الإحساس بالمظلومية في مواقف زي دي، مرة تانية الغرور والشعور المزيف بالاستحقاق بيخلوا الإنسان أغبى ما هو ممكن يتخيل.
4- فعليًا، إنت مش متضايق إن ليفاندوفسكي عايز يمشي، إنت متضايق عشان ما عرفتش تجيب هالاند، وعشان الحجة بتاعت فلوس السيتي -اللي هي حقيقية تمامًا ومنطقية تمامًا- مش منطبقة هنا، لأن في أندية كتير تقدر تدفع 60-70 مليون في لعيب زي هالاند عادي مش لازم السيتي، ولو ماكانش السيتي كان حيبقى حد تاني، فالخلاصة إنك كنادي وجمهور متضايق عشان ما عرفتش تقفش ليفاندوفسكي الجديد من دورتموند مش عشان ليفاندوفسكي القديم ماشي.