شوية حاجات، عادية، اتقالت مليون مرة، بتدور في دماغي دلوقتي:
– الحياة مش عادلة، ومحدش بيبقى “عادل” طول الخط، اللي بيتحط بين اختيارين ويختار أعدلهم، أحيانا بيختار الشر مش الخير.
– الخير والباطل أمور نسبية.
– ممكن ماتبقاش صادق، بس المهم ماتبقاش مؤذي.
– أحيانا هاتتسبب في أذى، محدش ايديه بيضا، وفي فرق شاسع بين الشخص المؤذي وبين الاذى اللي بنكون أحيانا طرف متورط فيه كأي تفاعل كيميائي.
– إنت مسئول ١٠٠٪ عن اختياراتك، وعن اختيار الشماعة الحلوة اللي هاتعلق عليها فشلك.
– كونك فشلت في حاجة، ده لا يعني نهاية الدنيا، عادي ممكن تكون الحاجة ديه كانت اختيار غلط من الأول.
– رجوعا للأذى، ماتسامحش أي حد مؤذي في حياتك، حتى لو مش هاترد الأذية، على الاقل خرجه من حياتك، أو اخرج إنت من حياته.
– تسامح أخطائك الكتير جدا، واقبل إن الناس ممكن ماتسامحكش عادي، حاول بس متكررش نفس الغبط تاني.
– مفيش شيء في الدنيا عدو ليك أكتر من “الكبر”. أنا وانت أتفه من حبة رمل، وأجهل من دابة. اسمع للي بيواجهك بعيوبك، وابعد عن اللي بيسقفلك ويصفرلك. الستقيف والصفير بيشوشوا الصورة جدا.
– الهروب بنفس المشاكل بدون علاج مش بيحل مشاكلك، بل بينقلها معاك لمكان تاني، حل مشاكلك، متهربش، هاتفضل في دايرة مغلقة.
– متقعدش مع ناس ايجابيين، ولا ناس سلبيين، اقعد مع ناس طبيعين، تايهين، بيبقوا سلبيين النهاردة، وايجابيين بكرة، اسبوع مكتئب، اسبوع فرحان، بني ادم طبيعي تلقائي عنده مشاكل ومتعايش معاها، وبيحاول يعالج آلامه، مش ضارب مسكنات طول الوقت، ولا بيضرب حشيش ٢٤ ساعة/ ٧ أيام.
– مش لازم تحب الناس، ولا انهم يحبوك، بس ممكن تتعايشوا عادي لأطول فترة ممكنة باللي يحقق المصالح المشتركة بينكم. التعايش اختيار أسهل وأخف بكتير من الحب اللي بيفسد التعايش بعد كدة.
https://www.facebook.com/muhmorsi/posts/1664312423622478