اضغط علي نفسك و اشتغل حتي و انت زهقان، حتي و انت تعبان، امسك الكتاب و ذاكر و انت قرفان، افتح النت و خد كورسات حتي و انت فاصل و ملكش نفس .. هيجرالك ايه يعني؟ ولا حاجة! اطلع من الComfort Zone (منطقة الراحة) لأن مفهاش أي انجازات
====================
بلاش تعيش في دور الضحية و تشتكي ليل نهار .. ماحدش فايق يسمع شكاوي حد، كل واحد عنده همومه و مشاغله، و اللي هيجاملك مرة و يطبطب عليه مش هيبقي فايقلك التانية، و لو فضلت تعيط و تزن و تشتكيله هيشوف رقمك و مش هيرد .. ماتعيش مستهلك و عاجز و عايز غيرك يساعدك .. كلنا عارفين إن الحياة unfair ..شيل نفسك و كمل لأن ماحدش فايق يشيلك .. أقوللك حاجة وماتزعلش؟ ماحدش مهتم بآلامك و مشاكلك .. علم نفسك بنفسك. كلنا عارفين إن المجتمع ظالم و التعليم ضايع و الكوسة و الفساد مبهدلين الدنيا .. ده الواقع .. تعايش معاه و شوفلك سكة.
====================
كل اللي انت محتاجه حاليا خط انترنت وجهاز كمبيوتر .. و تبقي سلطان زمانك، تعرف من مكانك ده توصل لأحدث ما وصل إليه العلم في أي مجال، تقدر دلوقتي تقفل الأمبير في أي تخصص، و انت عارف و أنا عارف كدة كويس.
بتحب حياتك؟ سواء آه أو لأ .. لو شديناك و رميناك قدام عربية مسرعة هتوافق؟؟ طبعا لأ، لأن كلنا خايفين علي حياتنا .. طب ماهي حياتك هي وقتك، و وقتك عبارة سنين و شهور و أسابيع و أيام و ساعات .. بترميهم في الزبالة ليه ؟؟
قرفان و مكتئب؟ عندك وساوس أو هلاوس أو فوبيا؟ الطب النفسي موجود .. ماتسيبس نفسك سرحان في اللا شيء بالساعات .. اتعالج و عيش حياتك عادي.
شجع نفسك كل يوم و اتقدم خطوة كل يوم .. و إلجأ لربنا، و اطلب منه و اتحايل عليه و عيطله، مش هيسيبك و مش هتهون عليه، و مش هيضيعك مهما كنت بس امشي صح
Copied from : Amr A. Eid
https://www.facebook.com/adnan.antar.1/posts/10211493960689649