الامان الحقيقي اللى انا اعرفه هو شيء نفسي وليس شيء مادي … الامان هو الاطمئنان والسكينه اللى جواك ان لكل مجتهد نصيب وان ربنا لن يضيع سعيك واجتهادك
هو الايمان بأنك مكلف دائما بالسعي وربنا وحده هو من يملك النتائج ويعطي من فضله لمن يشاء …
الامان والاطمئنان هو الايمان بان عطاء الله او منعه هو لحكمه عنده انت لا تعلمها
هو الايمان ان العطاء ليس بالضروره رحمه وان المنع ليس بالضروره عقاب … لان فيه عقاب على هيئة عطاء وفيه رحمة بتكون على هيئة منع
يمكن انت تقصد الراحه ؟
مفيش فى الدنيا راحه بالمعنى اللى انت تقصده … الراحه انك تكون منتج … الراحه انك تكون مثمر … الراحه ان يكون ليك قيمه … الراحه فى انك تكون مفيد لنفسك واللي حواليك … الراحه في انك تعمل اللي عليك وكل اللي تقدر عليه
اما بقى لو تقصد الامان المالي
فمن وجهة نظري المتواضعه ان ده تقريبا يا اما شيء خيالي ومش موجود او نادر جدا والاصل هو دوام السعي والمحاوله
مفيش حاجه اسمها كفايه كده …
انا مبسوط لحد كده او “طيبه كده”
كل يوم شئت أم أبيت هو تحدي جديد
وبنهاية كل يوم يا اما انت اتقدمت خطوه يا رجعت خطوه حتى لو انت شايف انك ثابت مكانك … لان ببساطه العالم بيتحرك غصب عنك … فاليوم اللى مش هتتحرك فيه هتكون فعليا رجعت كام خطوه للخلف بسبب ان العالم اتقدم كام خطوه لقدام
وخليني اكلمك بشكل عملي شويه
مجرد حفاظك واستمرارك على الوضع اللي انت فيه النهارده ده تحدي كبير فى حد ذاته ومحتاج سعي دائم
لان المبلغ اللي يقدر يوفرلك الامان المالي النهارده اقل من المبلغ اللي يقدر يوفرلك الامان المالي بكره فلازم تسعى فى زيادة دخلك النهارده علشان تقدر بس توفي التزاماتك بكره وتحافظ على الوضع اللي انت فيه النهارده
يبقى بالعقل كده …
بدل ما تفضل تتمرمط غصب عنك فى دور المدافع “كرد فعل” علشان تحافظ على حتتك الصغيره وتواكب سرعة تطور العالم حواليك … ما تتعب نفسك شويه زياده بإرادتك وتبادر وتكون فاعل وتسعى انك تكون افضل واقوى ؟
الخلاصه …
مفيش حاجه اسمها انا واقف فى مكاني
كل يوم بيعد عليك ويا بتطور يا بتدهور وعليك الاختيار
شمر دراعك واتوكل على الله