التصنيفات
مقالات الضيوف

النظرية النسبية الخاصة بمحمود

عجبني منطقه دا قوي الحقيقة

محمود أخويا بيطبق مبدأ جميل في الحياة، ماعرفتوش إلا بعد كتير قوي، اسمه “دا بالنسبالك”..

كان في المعرض النهاردة، فراجع بيوريني قلم جاف جابه بينور من فوق وشكله عجيب، وغالي.. فقولتله مش حلو يا محمود، قاللي بنظرة لم ولن تكل وفرحته هي هي بالقلم: دا بالنسبالك!

برضو من فترة طويلة كنا في سوبر ماركت وكان عاوز شيكولاتة، فطلعتله كادبوري بالمكسرات، فهو قاللي لا هاتها اوريو.. فبقوله دي أحلى، قاللي: بالنسبة لمين؟

وكان شكلي وحش قوي قدام الراجل اللي بيبيع، وسحب شيكولاتته في مرح من التلاجة وسابني وخرج..

عجبني منطقه دا قوي الحقيقة.. مش بس فكرة إنه مدرك انه احنا مش زي بعض، لكن عشان كمان عارف إنه مفيش ما يدعو للإحباط لما الآخر ماتعجبوش اختياراتك!

المصدر