التصنيفات
مقالات الضيوف

اساسيات فك المغالطات المنطقية

خطوات بسيطة حاول تدرب نفسك عليها قدر الامكان هتلاقي الصورة عندك اختلفت كليا عن الاول خالص

من الوقائع المهمة جدا في حياتي مرة زمان قريت بوست ع الفيسبوك في بداياته وعجبني منطق الكلام بتاعه وعملتله لايك بعد شوية لقيت بوست لواحد تاني بينتقد البوست ده ومطلع فيه كمية اخطاء منطقية كبيرة ..

اللي لفت نظري اني ما اخدتش بالي من كل الاخطاء دي وعملت لايك للبوست وكنت مقتنع بيه الاول ..
الموقف ده كان مفصلي معايا في حياتي ..

ازاي ما اوقعش في نفس الخطأ الكبير ده تاني ..

حاجة كان فيها كمية المغالطات المنطقية دي وعدت عليا بسهولة .. كنت مغفلُ مفيش كلام
بقيت بحاول ادرب نفسي اني اقرأ اي كلام بعقلية نقدية ..

مخليش اسلوب السرد الحلو ياخدني
ولا عشان الكلام يكون جاي على مزاجي مثلا وبيدعم رأي او حد بحبه او بيهاجم رأي او فكر او شخص مش بحبه فأمشي وراه وانشكح وتتوقف خلايا النقد والتمحيص والتثبت من الاخبار عندي ..
واني اعود نفسي اني اسمع الرأي التاني ودفاعه ورده واحط احتمال انه ممكن يكون هو الصح او ع الاقل الصورة مش بالشكل المشوه اللي بيحاول يوصله الطرف اللي قريتله او شوفت كلامه الاول بقيت – قدر الامكان – بـ

اقرأ اغلب البوستات او المقالات بعقلية دي معلومة غير مؤكدة محتاجة البحث وراها ..

وده اصلا خبر غير صحيح او اشاعة الاستدلال بيها مخل ويطعن في دقة نقل الكاتب مستقبلا

مبقاش عندي مصدر موثوق هحط عليه علامة ..

ودي حاجة ظنية هو جايبها على إنها حقيقة وباني عليها استنتاجات ..

ودي حاجة استثنائية خاصة هو اتعامل انها قاعدة ..

وده خطأ صحيح فعلاً بس عادي وهو مضخم حجمه ..

وده كلام هو اساء تفسيره او اختار تفسير سيء من وسط تفسيرات كتير ممكنة ليه وبنى ان هو التفسير الوحيد ..

وهنا بيجيب الخبر او المعلومة ويعمل توجيه للناس في فهمها عشان يخدم استدلالاته مع ان الخبر مش لازم يتفهم منه كده ..

ودي حاجة بيعملها قلة قليلة من اصحاب الرأي التاني هو عامل زوم عليها عشان يبين انها منتشرة مع انها نادرة ..

وده شخص منبوذ في الجهة التانية و٩٩٪‏ من الناس اللي هناك مش مؤيدين ليه بس هو بيستغل كلامه عشان يوصل فكرة ان كلهم كده (المتعصبين دايما في كل جبهة بيستفيدوا من وجود بعض) ..

وهنا استخدم اسلوب السخرية عشان يخلي الناس لا شعورياً تميل ضد الكلام ده مع انه لو فكرنا نلاقيه مقبول وليه منطق عادي ..

ودي حاجة انا لسه مقريتش فيها محتاج اقرأ ممكن يكون كلامه صح او غلط اركنها على جمب دلوقتي لحد ما نتأكد

مش معنى انه شكله قاري في الموضوع ان كل حاجة بيسردها على انها حقايق تكون فعلا زي ما بيقول ..

وهنا جايب فيديو للطرف التاني وهو فعلاً قال اللي هو بينتقده بس مجابش كلامه كامل واقتطعه من سياقه وممكن لما نسمع الكلام كامل منشوفش فيه حاجة غلط ..

اخطاء منطقية كتير جدا بتشوفها في اغلب الكلام اللي بتقراه ..
نادراً اصلا لما يكون كلام مش واقع في حاجة منها
طبعا مش بقول اني بعمل ده بشكل كامل وفي كل المرات بس فعلا لما تدرب نفسك على ده قدر الامكان هتلاقي الصورة عندك اختلفت كليا عن الاول خالص

المصدر