التصنيفات
مقالات الضيوف

ليه اعترافنا بحقه يبقى تبرير لغلطه

حقق العدالة و حاسب الكل .. غير كده يبقى هو ده التدليس بالمناسبة

ده حوار حصل بالنص بنشره كامل و يعتبر ملخص للقصة الماسخة..

-انت بتيجي عند شيكابالا و تقلب مدلس و تبرر له كل حاجة .
= تمام .. شكرا يا سيدي
– انت زعلت !؟ معلهش و الله يا شوقي انت انسان محتر..
= محترم صح !؟ علشان تقبلت تجاوزك و قلت الله يسامحك و بصيت في الارض شفتني محترم ..
طيب لو رديت و دافعت عن نفسي بنفس اسلوبك !؟
– يعني ايه ؟
= يعني انا لو احتديت عليك في ردي هبقى مش محترم صح !؟
مع ان في الحالتين انا هو انا متغيرش الا رد فعلي للاهانة،
بلعت الاهانة هبقى محترم من وجهة نظرك
و لو رديت عليها هتنتهي بخناقة !؟

– و انا هسكتلك يعني !؟
= ما هي دي مشكلة شيكابالا اصلا انه بيرد
– يرد على الجمهور !؟
الجمهور ياما شتم لاعيبة محترمة و مردتش !؟
= و ليه افترضت ان قبول الاهانة هو اللي صح !؟
– يا ديني .. انت كمان هتغلط اللاعيبة المحترمة !؟
= لا اللي بيسكت عن رد الاهانة دليل احترام ولا اللي بيرد عديم الاحترام و الموضوع كله متفاوت من انسان للتاني و مقدار ادارته لغضبه من ناحية و مقدار الضغط اللي اكيد مش متماثل.
– يعني هو مغلطش ؟
= غلط طبعا ، لو انكرت ده هبقى فعلا زي ما شتمتني غلط كتيييير جدا و نال عقابه بدل المرة مرات .
– ما احنا متفقين اهو
= اه .. بس له حق.
– يخرب بيت التناقض و التبرير !؟
= و ليه اعترافنا بحقه يبقى تبرير لغلطه !؟
ليه تفهمها كدة، ليه متعتبروش موقف مركب فيه طرفين .

– علشان الطرف التاني يبقى الجمهور و ده خط احمر و اللي داخل ضده خسران و غبي.
= بس قدسية الجمهور و خصوصا جمهور الكورة مجرد تابوه مبقاش موجود الا هنا و الجمهور بيتعاقب زي اللاعب و اكتر.
– نعم !!؟
= اه و لو في تجاوز عنصري ممكن يتحبس عناصر منه كمان !؟
– ههههه عنصرية يخرب بيت التاليف و الشنطة فيها كتاب دين، كل شوية تلزقوها في لونه، ما ياما عدى علينا لاعيبة سمراء،اشمعنى هو !؟
= اجابة السؤال عندك ، اشمعنى هو اللي يتحدف عليه موز و سوداني و اشمعنى هو يترفعله دبدوب قرد لابس فانلته في المدرجات !؟
– بس ده كان زمان و هو رفع الجزمة..
= و اتوقف .. و اللي عملها على الطرف التاني اتعاقب؟
في اي مرة من المرات خلال ١٦ سنة الطرف التاني اتعاقب؟
علشان كدة بقول معاه حق جدير بالتعاطف.

– تعاطف مع اكتر لاعيب مشاغب و عمل مشاكل؟
= انت بتتعاطف مع بطل الفيلم اللي غالبا بيعمل حماقات لمجرد انه رد فعل و له مظلومية .
– ادعاء المظلومية ده مضحك جدا معلهش يعني
= فعلا، مضحك جدا انك تقنع نفسك ان كل مرة حساب طرف واحد و معاقبته بيحقق العدل لان في اسطمبة في مخك خرجت منتج متماثل من اللاعب الاخلاقي يجب عن يلتزم بيه الجميع و يبلع الاهانة في صمت

– يبقى قلة الادب هي البديل و القدوة اللي بنقدمها يفضل يشتم الجمهور كدة ؟= للاسف هتكمل كدة غصب عني و عنك لحد ما يعتزل و بعد ما يعتزل كورة كمان و ممكن تتكرر شخصيته و حكايته مع غيره ، متقدرش تطالب طرف واحد بالالتزام كل مرة و انه يتحمل كل مرة نتيجة الخروج عن النص و تغمض عينك عن بقية الصورة و عن الطرف الاخر لمجرد خيالات القداسة اللي في دماغك .. حقق العدالة و حاسب الكل .. غير كده يبقى هو ده التدليس بالمناسبة .

المصدر