إبدأ_كبير في البزنس

تقول الحكمة الخواجاتي

Think big – Start small – Act now

–

ويقول المثل الشعبيّ

اللي يبدأ كبير – يفضل طول عمره كبير

–

فيا ترى أيّهما الصحيح ؟!

–

شوف حضرتك

مبدئيّا كده – الحكمة الخواجاتي صحيحة

–

المشكلة في المثل الشعبيّ

–

المثل الشعبيّ ده لو معناه إنّك تبدأ كبير من حيث #الحجم – فهو غلط

–

لكن – التصوّر الصحيح لهذا المثل هو إنّك تبدأ كبير #بعقلك_وبنظامك_وبمبادئك

–

#كبير_بعقلك /

–

يعني مذاكر كويّس – مذاكر بيزنس وماليّات وتسويق

مذاكر مجالك من الناحية الفنّيّة – وممارسه لفترة كافية كموظّف وكعمل حرّ

مذاكر سوقك وعارف منافسينك وعملائك وطريق تقييم منتجك وتسعيره

–

#كبير_بنظامك

–

يعني عامل خطّة – عارف إيه ييجي قبل إيه

يعني بتصبر على المرحلة لحدّ ما تخلص

مش كتير الزهق والملل وعاوز تنط من مرحلة للتانية – وتتنطّط من مجال للتاني

–

يعني عارف إمتى تعيّن موظّف – وإمتى تكتفي بإنّك تستعين بحدّ فريلانس

وإمتى لا ده ولا ده – والموضوع ممكن تعمله بنفسك

وإمتى لازم تفوّض الحاجة دي وما ينفعش تعملها بنفسك

–

#كبير_بمبادئك

–

ودي الأهمّ !!

–

كبير بإنّك وانتا صغيّر ومحتاج الفلوس – تبعد عن الحرام

كبير بإنّك تقول الصدق حتّى لو هيضيّع منّك ربح

كبير بإنّك عارف حقّ العميل – حتّى لو حقّه ده هيكلّفك

–

كبير بمبادئك بإنّك لمّا بتغلط بتتحمّل تكلفة غلطك – مش بتملص وتزحّف عشان تتهرّب من المسؤوليّة

–

كبير بمبادئك بإنّك شايف نفسك كبير – فما تخضعش للضغط من مورّد أو عميل كبير – أنا وانتا سواء بسواء – إنتا ليك مصلحة أنا باعملها لك – وأنا ليّا فلوس باخدها منّك – فما تتخيّلش إنّك بتعطيني الفلوس دي صدقة أو منّه – أو هتشتريني أو هتستعبدني بيها

–

وكبير بمبادئك بإنّك بعد دا كلّه – بتضيف الحتّة اللي مش متوقعة – عشان تقول وتثبت إنّك انتا الكبير

الحتّة اللي زيّ خصم مفاجيء لعميل مثلا – أو تقديم منتج زيادة على سبيل الهديّة للعميل – أو تخليص خدمة ما كانتش إلزاميّة عيك للعميل – أو ترشيح حدّ للعميل – أو ترشيح العميل لحدّ

–

تعمل دا كلّه وانتا صغيّر #في_الحجم

لكنّك كبير في #العقل_والنظام_والمباديء

المصدر