“بص يا سيدي واد شقي على برنس..واد شجاع على طيب كدة، واد مخلّص..واد من الآخر مبهر وساحر” دي لقطة من فيلمي المفضل طير إنت وإللي بتوضح حاجة مهمة جدًا.. ليه فيه رجالة بتبهر الست؟ ليه فيه ناس بتدخل دماغنا ما بتخرجش؟ ليه فيه ناس مش بنحس إننا هنعرف نلاقي زيهم بسهولة؟ ليه فيه ناس بنحاول لحد آحر نفس ما نفقدهمش مهما عملوا؟ ليه فيه شخصيات بندمنها ومش بنقدر نتخطى إعجابنا بيها؟
علشان السطرين إللي فوق دول إللي ممكن نحط لهم مصطلح يلخصهم The unique pairingg أو بالبلدي “الحاجة وعكسها”..لو الشخص أصبح عنده أكتر من اتنين Unique Pairing فهو بالتبعية بيتحول لشخص جذاب للجنس الآخر..
إيه بقى الموضوع ده؟ هديكي مثال
لو قابلتي راجل شاطر جدًا جدًا في شغله ومحترم ووقور في الشغل دي حاجة ممكن تلاقيها بسهولة..لكن إنه يبقى وقور جدًا في الشغل بس “هلاس” برة الشغل دي Unique pairing.
لو قابلتي راجل تقيل جدًا وراسي ومش مدلوق عليكي، بس في نفس الوقت Caring وحنين وبيهتم بيكي وقت ما بتكوني معاه ده Unique Pairing
لو قابلتي واحد رخم في خناقاته مع الناس وعصبي والناس كلها بتخاف منه وبتعمل ألف حساب بس معاكي بيبقى حد طيب جدًا ورومانسي وحنين ده Unique pairing
سهل إنه الواحد يلاقي شخص فيه صفات حلوة..الناس الكويسة كتير لكن صعب جدًا الواحد يلاقي شخصية فيها متناقضات كتير..الشخصية إللي فيها متناقضات شخصية جذابة..بتجننك..مش بتخليك عارف هو إزاي الشخص ده بيعمل كدة معاك وليه بيعمل كدة! العلاقة معاه بيكون فيها كم غريب من الأكشن..مرهقة..بس ممتعة!
نفس الشيء في الستات مثلا…شخصية ست Strong independent women ومقطعة الدنيا إجتماعات وخناقات ومحاكم وتيجي لحد عندك وفي مواقف معينة تبقى ست ضعيفة جدًا ومحتاجالك قوي وتبقى هتغرق في شبرين مية من غيرك..
شخصية ست وقورة ورزينة إلى حد كبير مع الناس ومعاك بتقلب “في في عبده” شخصية دي دي هتثير الفضول إلى حد كبير.
عادة الناس إللي عندهم الـUnique Pairing ده بيبقى عندهم لا إراديًا، هي شخصيتهم غنية ومليانة ودسمة فبيبقوا كدة..بس فيه ناس عندهم الذكاء الإجتماعي إنهم يظهروا الـUnique pairing ده ويستغلوه في علاقاتهم الإجتماعية..فبنلاقي الست القوية دي قاصدة تكون ضعيفة معاه وبنلاقي الراجل الشاطر في شغله ده قاصد يوري الست الجانب المسخرة إللي عنده كجزء من مميزاته..
إللي عندهم ده..إللي بيعرفوا يعملوا ده..بيبقوا شخصيات صعب الإستغناء عنها..ببساطة ما بيتعوضوش بسهولة..صعب قوي تشيلهم وتحط حد تاني مكانهم..فلو لقيتي نفسك مبهورة ودماغك هتنفجر من سر إعجابك بشخص ما إعرف إنه ده جزء كبير من السبب..هو واد شجاع على طيب كدة 
🙂
*كونسبت الـUnique pairing عرفته من واحد اسمه Matthew Hussey بيكتب وبيعمل فيديوهات كتير في فهم الجنس الآخر..
وربنا يقدرنا على فعل الخير بقى 
😀
https://www.facebook.com/photo.php?fbid=10154319533893090&set=a.10150855543368090.417980.748408089&type=3&theater