طول ما إنت سايب السلام النفسى بحد ذاته ومركز على التظاهر بالسلام النفسى هتفضل عايش ف صراع جوانى عميق
اللى حاصل إننا وكالعادة بنختذل كل حاجة حلوة ف كام بند والسلام
فتلاقى حاجة زى السلام النفسى دى حشرناها ف إنك بس تنفض للناس وتعمل كل حاجة تخطر على بالك بدون أى تفكير ف أى حاجة تخصهم وحتى الحاجات اللى تخصك وتخص مستقبلك وعيشتك بتتجاهلها لمجرد إثبات إنك لا مبالى وإنك متسق مع ذاتك وإنت ف حالات كتير بتبقى متسق مع ذوات غيرك بس مش واخد بالك
جنون السوشيال ميديا ف الحقيقة من أكتر الأدوات اللى ساعدتنا على كده لأن كلنا إتربينا ف مجتمع بيخوفك أكتر ما بيحتويك، بيحتقر كونك إنسان أكتر ما بيحترم ده فيك، حتى بيعتبر أى دليل على إنسانيتك إنه ضعف
وفجأة كل حاجة نقصاك ع الأرض لقيتها على السوشيال ميديا
مرة واحدة بقى ليك رأى وبيتسمع وبيتاخد جد وفيه ناس كمان ممكن تشتمك عليه
مرة واحدة بقيت تعرف تنتقم لنفسك بشوية زراير
مرة واحدة بقيت حاسس بالإنجاز والسيطرة والحب والإحتواء وبكل حاجة عمرك ما طولتها، مش عشان إنت مش وش كده، إنما عشان عمر ما حد نولهالك، مع إن كان الأصل إنك تنتزعها منهم ع الأرض، بس إنت إستسهلت وخدت ده كله أون لاين
فتلقائيًا بقت السوشيال ميديا هى الميزان بتاعك، هى اللى بتفرحك أو بتنكد عليك
ومع الوقت إنت خدت سلوكك “المُكتسب وهميًا”من الأون لاين ونزلت بيه ع الأرض كمان، فبقيت ولا عارف تبقى نفسك ف الحقيقة ولا أون لاين
ومع الوقت تهت من نفسك ومبقتش فاهم إنت بتزعل ليه ولا إيه اللى بيفرحك
وكذلك الناس، الناس بقوا يزعلوا من حاجات عمرها ما كانت بتزعلهم وبقت تبسطهم حاجات العادى بتاعها إنها تقهر
وف الأخر إنت قاعد ف النص بين نفسك اللى إتجننت من اللى إتعمل فيها وبين الناس اللى إنت عايز تتسق معاهم وهما أصلا متجنين بنفس سبب جنان نفسك
#كلنا_مجانين_لا_أستثنى_منا_أكونت
#وادينا_قاعدين
https://www.facebook.com/yahiakordy0/posts/1064313760286847