التصنيفات
مقالات الضيوف

عن باسم يوسف برشلونة

عن باسم يوسف برشلونة

اجمل حاجة في باسم يوسف انه طبيعي. شخص غير مصطنع. شخص غير مُدعي بطولة. شخص لا يحمل نفسه بما ليس فيه.
شخص غير عنتري.

اجمل حاجة في باسم يوسف انه صريح. انه عارف طاقته وطاقة الناس اللي حواليه.
شخص قاري الوضع حواليه صح.
شخص عارف ياخد قرار صح.
شخص عارف يحافظ على اللي حواليه. ميعرضهمش لخطر علشان يبان بطل.

ناس كتير دلوقتي ممكن تبيع حاجات كتير علشان تبان ابطال. تبان رموز. تبان اسود.

مشكلة باسم يوسف الرئيسية الحقيقية في وجهة نظري انه شخص ناس كتير حملته فوق طاقته. شخص ناس كتير فوضته يتكلم باسمها. باسم صوتنا. باسم الصوت لما الدنيا تبقى سكوت. هيضرب ويجيبلنا حقنا واحنا قاعدين بنشرب الشاي بلبن تحت البطانية يوم الجمعة. هو باسم هيتكلم ويقول ويختطر واحنا نقعد ساكتين علشان الولاد والوظيفة والترقية وعبير اللي مستنياني اتقدملها.

حارب يا باسم.. مرسي يا باسم.. السيسي يا باسم.. القمع يا باسم….الفحم يا باسم
“ادهم… انت هتاكل سندوتش الكفتة دة”….

حطينا باسم ادام 100 مدفع ونزلنا تحت البطانية واحنا بناكل الكفتة.

يمكن كنت عارف كلام كتير من اللي باسم كتبه في رده على الكاتب عمرو سمير عاطف. كنت عارف حجم الضغوط الكبير اللي عليه.
بس بردو محدش يعرف كل التفاصيل. كل الالم. كل المعاناة.

باسم شخص بيفضاله الشارع. وبتترصله كراسي في القهاوي زي برشلونة. باسم زي برشلونة لعبه حلو. سهل ممتنع. لمسة ولعبة.. فيديو وضحكة. بس برشلونة مؤسسة له جمهور واقف وراه مبينقلبش عليه لو عمل ماتشين مش حلويين. جمهور بيروحله ١٠٠ الف كل ماتش. وبيغنيله نشيده الخاص. وبيرج الملعب في ماتشه مع فريق “العاصمة والسلطة” ريال مدريد. مش بيسيبه لوحده والجعاجين والبلطجية قدام مسرحه.

بس باسم يوسف لوحده.

وعلى فكرة بكل دعم جمهور برشلونة في العالم كله. سلطة الفيفا وقف باسم يوسف، اقصد برشلونة، عن تسجيل لاعبين سنة كاملة. قرار تعسفي وجاحد.

وهو الراجل قالها في يوم اعتزاله “انا مش مناضل ولا محارب”

فارحموا الراجل بقا ومتحملهىش فوق طاقته.

الخلاصة… عايز تقيم موقف حد. خوض معركته. اقف موقفه. وشيل ضغوطه. او اقعد ساكت.

https://www.facebook.com/haitham.tabei/posts/10156044098975632