امبارح بريطانيا جمّدت ارصدة نادي تشيلسي الانجليزي لمالكه الروسي “رومان ابراموفيتش” وحظرت بيع او تجديد او شراء لاعبين وحتى منعته من انه يبيع تذاكر الماتشات للجمهور لحد ما اجبرته انه هيعرض النادي للبيع بتراب الفلوس خلاص مع انه راجل ناجح وقدر انه يخلي تشيلسي بطل من لاشيء وهو كان نادي صغير الاول، وكل ده ليه؟ عشان هو “روسي” .
– من شوية شركة ميتا المالكة للفيس بوك سمحت بحاجة غريبة جدا، سمحت ان بعض الدول زي اوكرانيا وبولندا واستونيا والمنطقة دي كلها انها تشتم وتحرض ضد روسيا او الروس براحتها على الفيس من غير ما ياخدوا حظر، يعني خالفت قواعدها اللي مصدعانا بيها وشالت الحظر خالص وسمحت ان الناس في الدول دي تشتم وتهدد روسيا او زعيمها او شعبها بأي الفاظ او وصوفات مخالفة في البوستات والكومنتات عادي جدا اذا كانوا افراد او حتى مدنيين او بشكل شخصي فا اشطة يعني .
(موقفين من ضمن مواقف كتير حصلت يبينولك ان القيم الانسانية والحريات اللي بتعلو فوق شئون الدول والحكومات دي سلعة بيبيعوهالك زي اي سلعة تانية وانتا بتشتري عادي، بس لما الموضوع يكون بيخصهم هما، هاتلي القيم دي بقا على جمب وارجع اتعامل زي العصور الوسطى براحتك)
– عيب يا حمادة متهاجمش اللي استباح ارضك وارض اخواتك ونازل فيهم ضرب، وخد حظر واقفل الحساب كله عشان انتا نوتي ومتطرف ودا تحريض وكره وتعنيف، بس لما يبقا الموضوع يخصهم هما، شيل بقا الحظر خالص واللي عايز يقول حاجة يقولها حتى لو هتهدد بشكل صريح، انتو ابطال.
– طبّع يا حمادة وتاجر معاهم وحبهم غصب عنك اصل دي الانسانية والقيم الانسانية ومتعترضش احنا في الالفية التالتة وكلنا بشر، بس لما الموضوع يخصهم هما، يالا بقا أمملي الشركات دي كلها وميّز تاني وارجع بقا للمفاهيم القديمة اصل احنا بندافع عن الوطن.
عشان بس محدش يضحك عليك تاني ويفهمك انهم عالم اول واحنا عالم تالت والكلام ده، كلها زي بعضها.