١- اللى حصل فى الفترة اللى فاتت فى البلد شىء مش هين، مش بس علشان الأحداث اللى حصلت .. المشكلة فى الأحداث اللى هاتحصل.. مثلا معدل قتل/اعتقال الناس هايزيد … معدل الناس اللى هاتبرر الموضوع هايزيد .. معدل الناس اللى ممكن فعلا ترد “بغباء” هايزيد
٢- “الهجرة امر لابد منه” … لو حضرتك لسه مكتشف دا دلوقتى.. فاسمحلي أقولك ان دا غباء منك لان الموضوع أتأكد من فترة كبيرة.. اما بخصوص انك “مستحدث” على الهاشتاجات اللى بتتكلم عن الموضوع ده وهاتقعد تقرفنا بأنك تكتب هاشتجات انك بتفكر فى الهجرة وأنك مش طايق القعدة هنا.. فاسمحلي برضه أقولك ان الموضوع مش ناقصك، مش هايبقى ناس عندهم لحمة بيعزموا على ناس عندهم لحمة علشان ياكلوا لحمة
٣- هاتقولى طيب طالما الموضوع أتأكد انت بتمثل ليه وبتكتب بوستات فيها تفائل؟ هاقولك انا متأكد بنسبة كبيرة انى مش من جيل “التمكين”‘ودا مريحنى انى بحاول اكتب حاجات لجيل التمكين لما يجى يلاقيها.. لأننا ملقناش دا لما طلعنا ومحدش وجهنا ودا اللى خسرنا الحاجة الكبيرة اللى عملناها
٤- انت هاتعمل كده كتير؟
كتيير جدا .. المبدأ عندى ان اليأس مش بس خيانه .. اليأس بيساوي كفر .. ” انه لا ييأس من روح الله الا القوم الكافرون”.
٥- ودا يخليك تشتغل فى البلد دى وتصلح منها؟
هافكرك بحديث رسول الله ” اذا قامت الساعة وفى يد احدكم فسيلة، فان استطاع ان يغرسها فليغرسها”.