التصنيفات
المدونة

نشوة الانبساط

احد الحاجات اللي بتعرفها مع الوقت هي تعريف “نشوة الانبساط” بالنسبالك ايه
 
انت ممكن تبقي في شركة كبيرة وعندك تحديات كبيرة في الشركة وتبقي مبسوط جدا…التحديات دي لو قلت ..او لو اتكررت وبقت مملة بالنسبالك هتلاقيك مبقتش مبسوط بوجودك في الشركة ، حتي ولو بتاخد مرتب كبير او ليك postion عالي
الفكرة ان الموضوع مبقاش فيه “نشوة” تستمتع بيها
في حد ممكن يكون بيحب يدخل شركة/علاقة فيها مشاكل كتير ..هو بيستمتع بانه يحل المشاكل…هي دي النشوة بالنسباله
في حد ممكن يقولك انه بيفرح لما ينجح ويكسب فلوس …بس في الحقيقة هو لو لقي مكان بيديله فلوس من غير ما يعمل حاجة هايبقي مبسوط..هو بيحب يبقي معاه فلوس كتيرة بغض النظر جت ازاي …وحد تاني بيحب انه ينجح حتي ولو في عمل تطوعي او مكان صغير او انه يبقي موجود في مكان كبير “حتي ولو ببلاش” بس يبقي بيشتغل فيه ويحس بطعم النجاح
الموضوع ده مفهوش صح وغلط
الفكرة مبنية علي تربيتك وافكارك وخبراتك ومواقفك اللي مريت بيها وشكّلتك
 
لو قدرت تعّرف “نشوة الانبساط” بالنسبالك ايه هاتوفر علي نفسك وقت ومجهود كتييير جدا..في ناس بتسيب وظيفتها/بلدها/الشخص المرتبط بيه لانه حاسس انه مبقاش مبسوط “زي الاول” …مع العلم انه ممكن يبقي كان بيعمل حاجة تاني وهو في الوظيفة دي او موجود في المكان ده او مرتبط مع الشخص ده …الحاجة دي هي اللي كانت بتبسطه وبتديله طاقة يعمل اي حاجة تاني
بمجرد ما الحاجة دي بتروح بيبقي تايه..بيفكر يسيب/يغير كل حاجة هو بيعملها او مرتبط بيها لمجرد انه فاكر انها السبب في انه مش مبسوط
 
دور علي الحاجة اللي بتديك “نشوة الانبساط” سواء كان شخص/شغل/مكان وحافظ عليها..ضحي باي حاجة مهما كانت في سبيل انك متخسرش الحاجة دي
الحاجة دي لو راحت هاتخسر كل حاجة بالتدريج.