عايز تقرف اي حد في عيشته أثناء اي نقاش في أي موضوع ، لأي هدف .. استخدم دائماً مغالطة خيال المآتة ..
مغالطة خيال المآتة Straw Man هي المغالطة الأشهر اللي بيستخدمها المساخيط حول العالم للتشويش على أي طرح منطقي أمامهم ، لمجرد انهم كارهين صاحب الطرح مسبقاً ، أو لمجرد لذة الاشتباك ومتعة الهبد – ودا الاكثر شيوعاً – ..
انت بتكـره ( س ) من الناس مثلاً .. متضايق منه ، مش متفق معاه لأي سبب .. قال رأيه امامك في مرة .. رأيه وجيه او لا ، مش مهمتك أصلاً .. المهم تاخد رأيه تحرّفه تماماً .. تسطّحه ، او تدعي انه يقصد أشياء لم يقلها ، أو تغذيه بصور خاطئة بشعة ، الخ .. وبعدين تبني عليه موقف معاكس ..
وموقفك المعاكس دا هيلاقي الترحيب من كل المحيطين بك المتفقين معاك ، اللى هما في البداية عندهم موقف عدائي ضد ( س ) ، حتى لو مش فاهمين رأيه ..
مثال :
س 1 : انا بدعم ان الحرية تكون هي المكون الأساسي للمجتمعات..
انت : يعني عايز الناس كلها تنام مع بعض في الشارع ، والدعارة تتقنن ، والنسوان تقلع ، وامك تشيل الحجاب ؟
س 2 : العلم هو طريق نهضة الأمم ..
انت : انت ملحد ؟
س 3 : أنا شايف ان النيش جهاز ملوش لزمة في البيت ..
أنتي : انت عايز تقلل رقبتي قدام بنت خالتي ..
في كل هذه المواقف، انت شوّهت تماماً رأي ( س ) واختزلته عشان تساويه بأمور منفّــرة جداً .. ساويت الحرية بالشذوذ ، العلم بالالحاد ، واهمية النيش ساويتها مع موقف اجتماعي فيه خصومة ، الخ .. استخدمت صور بشعة مبنية على رأي عام قاله ..
النتيجة : ( س ) هيدخل معاك في نقاش مُرهق يشرحلك رأيه بتفاصيل اخرى .. فإنت تاخد كل تفصيلة منهم ، وتعمل عليها مغالطة خيال المآتة مرة أخرى ، وهكذا ..
في مرحلة ما ( س ) هيخرس تماماً .. لكن خرسه مش لأن حجتك أقوى ، هو هيخرس لأنه الافضل لصحته ووقته انه يخرس .. نجحت في إخراسه بجهلك ..
الطريقة دي هتخليك تكسب كل مناقشاتك نظرياً ، واسكات الطرف الآخر في ابداء رأيه في كل المجالات وتخرسه .. في السياسة ، في الكورة ، الدين ، الامور الاجتماعية .. نقاشات مع اهلك ، مع زوجك / زوجتك .. وطبعاً نقاشاتك على الفيسبوك ..
لكن أهم حاجة وانت بتستخدم المغالطة دي ، انك تكون عارف من جواك انك مجرّد خيال مآتة مش أكتر .. بهلوان تافــه .. يعني إياك تراكم المواقف اللي بتكسب بيها النقاش ، وبتخرس بيها الألسنة بإستخدام المغالطة دي ، تجعلك تتوهم انك بتفهم او فصيح او عندك القدرة على النقاش ، أو انك جلّاد وأسد النقاشات ، الخ..
يللا جرّب الطريقة التافهة دي على ضمانتي وادعيلي ، بس متجرّبهاش فيا ..