ليه عاوز توصل لسبب كلّ حاجة وتفسير كلّ حاجة ؟!

هو /

ليه يا أخي واخد كلّ حاجة بجدّ ؟!

ليه بتتعب نفسك في البحث عن التفاصيل ؟!

ما تعيش الحياة ببساطة زيّ ما الناس كلّها عايشاها

–

أنا /

ومين قال لك إنّي مش عاوز أعيش سبهللة وابقى تافه زيّك

لكنّي للأسف لقيت إنّ الحياة مش ماشية كده

–

حاولت مرّة اعمل مشروع بالسبهللة – فشل – مش عارف ليه – مش عارف دا غلط منّي – ولّا غباء من الآخرين

–

حاولت آخد الأمور بسطحيّة – وما أركّزش في التفاصيل – جات تفصيلة بسيطة وقّعت لي شغل سنين – وخسّرتني كتير

–

كان فيه حاجة بتحصل في الشغل عاملة لي مشكلة – وما كنتش عارف سبب المشكلة إيه

قلت لنفسي مش لازم تعرف سبب كلّ حاجة

جات الحاجة دي دمّرت لي الشغل – لكنّي مش عارف دمّرته ليه – ولا ازّاي – أصل بيني وبينك انا ما باهتمّش بالحاجات دي

–

حاولت مرّة أعيش ببساطة – لقيت المنافسين مش واخدين الموضوع ببساطة – لقيت المورّدين مش عاوزين يعطوني الحاجة بسعرها العادل ببساطة – لازم اتعب معاهم مش عارف ليه – مش عارف ليه المورّدين معقّدين – لازم اتنطّط من مورّد للتاني عشان آخد الجودة المناسبة والسعر العادل – حاولت أتعامل مع العملاء ببساطة – لقيتهم عاوزين ياخدوا حقّهم وأكتر من حقّهم – بأدقّ التفاصيل – وبسعر غير عادل – مش عارف عاوزين ياخدوا حقّهم ليه – ناس معقّدة

–

صدّقني- أنا حاولت أكون تافه زيّك – بسّ ما عرفتش

–

حاولت اكون تافه واكسب قليّل – لقيت متطلّبات الحياة بتلزمني أكسب كتير

حاولت أكسب كتير ببساطة من غير جري ورا التفاصيل – ما عرفتش

حاولت أعيش فقير زيّك – ما عرفتش

المصدر