ليه انتا مش عارف تحوش ؟!
اولا، الكلام لأصحاب العمل الحر أو البيزنس، وليس للموظفين
لكن لو حضرتك موظف، إقرأه بردو، عشان لما تبقى عمل حر أو عندك بيزنس.. هتقعد سنين مش عارف تحوش، وهتبقى هتتجنن لإنك مش عارف ليه انتا مش عارف تحوش رغم إنك بتكسب فلوس نظريا المفروض إنك تعرف تحوش منها، بل تعرف تحوش معظمها، لكن بردو هتبقى مش عارف تحوش حاجة.
لحد ما هتكسر هذه الدائرة الجهنمية إن شاء الله
قبل ما نشرح الأسباب ونطرح الحلول، خلينا الأول نسأل
هل التحويش مهم أصلا للي شغال في العمل الحر أو عنده بيزنس ؟!
والإجابة، أيوه طبعا
العمل الحر عقيم، مهما تشتغل عمل حر.. عمرك ما هتعمل فلوس
وده يرجع لسبب بسيط جدا.
ألا وهو إن الدخل في العمل الحر ليس دخلا سلبيا
يعني إيه ؟!
يعني دخل العمل الحر معتمد على شخصك، على مهارتك،
ودي حاجات لا يمكن مضاعفتها
عشان تعمل فلوس، هتحتاج تعمل بيزنس يدر عليك دخل سلبي،
يعني دخل غير مرتبط بشخصك
وعشان تعمل البيزنس ده.. إنتا محتاج فلوس
طيب وهتجيب الفلوس منين ؟!
من الإدخار طبعا
طيب والشراكة
طاب والتمويل
أنا قرات عنهم في كتب البيزنس
للأسف الحاجات دي خارج مبادئي.
اشتغل من فلوسك فقط في بداية حياتك، بدل ما تلبس في مقلب من مقالب الشراكة أو التمويل يقصف مستقبلك
لما تبقى تكبر وعاوز تكبر قوي،
نبقى نتكلم في موضوع الشراكات والتمويل
طيب دي أهمية الادخار لصاحب العمل الحر
طاب واللي عنده بيزنس أصلا، محتاج يدخر ليه ؟!
عشان يكبر البيزنس بتاعه،
وتكبير البيزنس ده محتاج راس مال زي إنشائه بالظبط
نرجع لأسباب عدم القدرة على الإدخار
وهما في رأيي تلاتة، الثالثة ستبهرك
السبب الأول
#الاستهلاك_بأثر_مستقبلي
يعني بتشتري دلوقتي حاجات آجل . وتبقى تدفع تمنها لما تيجي فلوس
فكل ما تمسك مبلغ، لسه هتقول هيييييه،
تفتكر إن عليك ألف جنيه لشركة كذا وألفين للميكانيكي و ٣ آلاف للي مش عارف إيه، وقسط عربية وقسط شقة و و و
فتدفعهم، فتلاقي الفلوس اتبخرت،
بس ع الأقل انتا ارتحت من الديون، يبقى إيه
يبقى كفانا تكرارا لأخطائنا القديمة.. ولنخطأ أخطاءا جديدة
فتقوم رايح شاري حاجات تانية بنفس الطريقة.. وهكذا دواليك
والحل لهذه المشكلة هو عدم شراء إلا ما تملك ثمنه،
و الاستغناء عن كل ما لا تملك ثمنه
مع الحل ده مهم جدا إنك تتخلص من صفة الملل من المقتنيات
عندك موبايل شغال.. يبقى ما تغيروش لحد ما يبوظ
عندك عربية شغالة.. يبقى ما تفكرش تشتري عربية جديدة قبل ما يكون تمنها جاي لك من بيزنس جديد هتعمله بتمن العربية دي
سيدنا عمرو بن العاص رضي الله عنه قال
لا أمل داري ما وسعتني
ولا أمل ثوبي ما سترني
ولا أمل زوجتي ما أطاعتني
إن الملال من سيء الاخلاق
السبب الثاني
#قانون_باركنسون
قانون باركنسون بيقول تتمدد الأشياء لتملأ الإناء
تخيل إن عندك غاز مضغوط في قارورة حجمها ١٠ مل مثلا
نقلت الغاز ده لقارورة ١٠٠ مل، الغاز هيتمدد ليملأ القارورة التانية
طيب نقلت الغاز ده لقارورة حجمها لتر.. نفس الكلام
الغاز هو احتياجاتك
والقارورة هي دخلك !!
ف كل ما دخلك بيزيد.. احتياجاتك بتزيد
كنت بتكسب ١٠ آلاف جنيه في الشهر،
احتياجات بيتك كانت ١٠ آلاف جنيه في الشهر
طيب بقيت بتكسب ٥٠ ألف جنيه في الشهر
هتلاقي احتياجاتك بقت ٥٠ ألف جنيه في الشهر
بردو ؟!
ايوه بردو
ولو دخلك بقى مليون جنيه . هتصرفه كله
باركنسون بيقول كده
طب والحل ؟!
الحل إنك تحط رقم ثابت لمصاريف بيتك بغض النظر عن إنتا كسبت كام الشهر ده ولا الشهر اللي بعده
وتحافظ على مستواك الاجتماعي ثابت رغم ارتفاع مستواك المادي
يعني مش كل ما تكسب أكتر.. تتفشخر أكتر..
فتلبس أحسن
وتتفسح أكتر
وتجيب آيفون
وتغير العربية
وتنقل في كومباوند
و و و
حافظ على مستواك الاجتماعي، وثبت مصروف البيت
السبب الثالث ( اللي هيبهرك )
#عقلك_الباطن
عقلك الباطن عارف إنك لما تحوش، هتعمل بيزنس،
أو هتكبر البيزنس بتاعك.. فهتتعب
عقلك الباطن دوره إنه ما يخليكاش تتعب.. حتى لو هيخليك تخسر. عادي
عقلك الباطن هيخليك تفرقع الفلوس أول بأول بدل ما تحوشها،
فما تعملش بيزنس.. فترتاح
فيبقى هوا نجح في مهمته
طب والحل ؟!
الحل إنك تدخر قبل ما تصرف.. مش العكس
يعني، بيتي بيصرف في الشهر ١٠ آلاف جنيه
وأنا كسبت الشهر ده ٥٠ ألف مثلا
فأقول هاصرف ١٠ آلاف على البيت، وأحوش الباقي
هتنزل تجيب احتياجاتك، هتلاقي نفسك صرفت ال ٥٠ ألف!!
إزاي ؟!
دا شغل عقلك الباطن، شغل جوا دا يا شبح
أمال إيه الصح؟
الصح إنك تنزل الأول تجيب دهب مثلا ب ٤٠ ألف
فما يتبقاش معاك إلا ١٠ آلاف،
وتحياتي لعقلك الباطن بقى