ده رد مجمع للأسئلة الي يوميا بتجيلي بعد الهجمة الأخيرة على الجمعيات الخيرية ، بس بداية أنا بتكلم عن مرسال الي أنا مسؤولة عنها فقط. وقد تشترك أماكن أخرى في بعض القواعد :
1.مفيش حاجة اسمها الرسايل أو أي شركة تحصيل بتاخد 50% والتهويل ده. المبالغ لا تتعدى جنيهات . ولو حضرتك بتسأل على أقل تكلفة لتوصيل تبرع لنا دون خصم فهي إنك تودع بالبنك أو المقر أو تطلب مندوب ولو ساكن بعيد والمبلغ صغير يفضل تبعتهم بفوري أو مصاري أو أمان لإن وقتها تكلفة المندوب أعلى ولو متقدرش احنا تحت أمرك نبعتلك مندوب. ولو برة مصر يبقى تحويل أون لاين.
2. مرسال بتدفع مرتبات لإنها مكان خدمي صحي مينفعش يقوم على جهود متطوعين بيكونوا متاحين وقت تفرغهم. احنا بنجري نلحق المرضى 13 ساعة عمل شغل الفروع يوميا ومش ملاحقين. ومش معقول الناس دي هتتفرغ بالجهد ده دون راتب ولا هتشتغل من الشارع فبندفع كمان إيجارات. البندين دول مع بند الدعايا الجاي بيدفعوا جزء من العاملين عليها من الزكاة بما إننا جهة موثقة من الدولة وجزء من التبرعات العامة الغير موجهة لغرض ما وجزء متبرعين بيدفعوا للإداريات تحديدا وجزء من نشاطاتنا التانية الي كلكم متابعينها كورسات وبيع منتجات وإيجار قاعات وإيجار الروف واتفاقيات مع محلات وشركات بتدينا نسبة من أرباحها. إجمالي الي مرسال بتاخده من التبرعات السنوية لكل الإداريات 10% طوال السنة.
3. ميزانية الدعايا الإعلانات. معندناش تلفزيون. فالموجود إعلانات فيس بوك ومطبوعات وحضور إيفنتات أو تواجد في المقرات أو أماكن مؤجرة وقتيا.
4. ليه اتبرع لجمعية مش لحد قريب مني ؟ لو تعرفه وواثق فيه اتفضل ربنا يعينك..ومش معاك أي فائض براحتك. تمام. بس متقولش إن ده كلام صالح للتطبيق العام . لإن 90% من الحالات على الأقل لا هتعرف تعملها بحث اجتماعي ولا تتاكد من احتياجها الفعلي ولا هتعرف تحقق الفايدة القصوى من التبرعات. الدواء الي هتروح تشتريه من الصيدلية بمبلغ ما ، احنا بناخده من الشركة الأم بعروض بتوصل لخمسين المية لما الرقم يضرب في مئات وآلاف المرضى بيطلع ملايين. المستشفى والمعمل الي بتتعامل معاهم مرة مش زي الي بينك وبينهم تعاقدات طويلة المدى بتنزل التكاليف للنص والتلت. وغيرها كتير من الأمثلة. والمهم الي مش مريحك متعملموش بس متطلقش أحكام عامة دون دراية
https://www.facebook.com/heba.rashed.16/posts/2085859361442666