من كام يوم وفي هوجة على إيلون مصك Elon Musk من بعض الصحفيين لأنه أعلن إنه بيفكر يعمل موقع يُقيِّم مواقع الأخبار والصحفيين من حيث مصداقيتهم .
القصة بدايتها لما أكتر من صحفي مدعوم من شركات البترول هاجموا شركة Tesla اللي بيديرها مصك بأخبار كاذبة عشان يشككوا في نجاح الشركة اللي مهمتها الأساسية تسريع الإنتقال من البترول والفحم للطاقة النظيفة .. وبالتالي كلامهم يؤثر سلباً على قيمة الشركة في البورصة ويخوف الناس من الاستثمار فيها.
الصحفيين بقى مستحملوش فكرة التقييم دي .. إزاي حد يقيمنا؟! .. ومين يفهم في شغلنا عشان يقيمنا؟! .. وده تعدي على حرية الصحافة وإرهاب للصحفيين اللي بيخاطروا بحياتهم عشان ينقلوا الحقيقة .. ( مع إن كل الصحفيين دول بيغطوا أخبار اقتصادية وتقنية ومفيش مخاطرة بالحياة ولا يحزنون .. بس لزوم الزيطة!)
شوية الصحفيين دول رفضوا إن حد يشكك في مصداقيتهم ويقيمهم على أساسها .. على أساس إن كل الصحفيين شرفاء .. مفيش فيهم فاسد أو مضلل! .. وإن مش مسموح لحد من بره مهنتنا إنه يقيمنا وإلا ده يبقى تعدي على حرية الصحافة والديمقراطية و .. و.. إلخ
وقالوا على مصك إنه مش فاهم يعني إيه صحافة ولا بتشتغل إزاي ولا التحديات اللي بيواجهها الصحفيين.
——
من فترة كان في أخت كريمة نشرت تجربة شخصية ليها مع الأطباء بتوضح فيها تجاهل الأطباء لشكواها بدعوى إنها مجرد مريضة بتدلع وهي مش هتعرف أكتر منهم . وبعد زمن ومعاناة اكتشفت فعلاً إنها مريضة بمرض معين هو السبب في شكواها .. لما البوست بتاعها انتشر .. دخل أطباء يهاجموها بنفس الاسطوانة .. حرام عليكم انت مش فاهمين اللي الأطباء بيشوفوه! .. إلى أخر الأسطوانة اللي بتفترض إن عيب وحرام إنك تتهم طبيب بالفشل أو الإهمال .. وكأن مفيش طبيب واحد فاشل أو مهمل ..
—–
أنا خريج حاسبات ومعلومات .. كذا مرة أشوف مجموعة من الخريجين عاوزين يقدموا عريضة أو طلب للحكومة/مجلس الشعب لاستصدار قرار يمنع غير الخريجين من حاسبات ومعلومات بالعمل في مجال هندسة البرمجيات .. دايماً كنت بشوفها فكرة سخيفة وعقيمة .. في ناس خريجي حاسبات مستواهم في البرمجة زفت .. وناس خريجي تجارة وزراعة اتعلموا بنفسهم مستواهم رائع .. وفي مجالنا المهم الحرفية مش الشهادة .. خصوصاً إن شغلنا مفيهوش مخاطرة بحياة الناس زي مهنة الطب مثلاً .. وبالتالي محاولة منع الأخرين من العمل في مجال البرمجة هو مجرد تعصب للمهنة والشهادة ليس إلا .. كنت دوما أرفض مثل هذه الطلبات وأعارضها بوضوح.
التعصب للمهنة تدفعك للدفاع عن الفسدة والفشلة لمجرد أنهم أبناء مهنتك وتضع نفسك معهم في كفة واحدة .. كل مهنة وبها الصالح والطالح… خصوصاً في مصر .. إحنا بلد فاشل على كل المستويات تقريباً .. فلا تظن أن مهنتك – مهما كانت – نجت وحدها من هذا الفشل!
https://www.facebook.com/Ali.Muhammad.Alii/posts/10155809942915735