لما الناس بتطلب نصيحة من ناس الكلام بيبقى كله على وجهات النظر بمعنى ” نقاش يخص الفكرة ” فلما حد ينصحك بقى يا عزيزي القاريء وانت تبقى مختلف معاه.
وعايز تختلف معاه تجنب استخدام كلمة ” انت. “
اصل انت وانت وانت.
كل ما هو بعد انت وبتقول فيه كلام سلبي هو ببساطة غلط في الشخص. الفكرة لو بتناقشها هتلاقي نفسك بتتكلم بصيغة الغائب وعن نفسك زي ” ما لو عملت كذا هيحصل كذا، ودا ماينفعش علشان دا كده هيبقى كذا ” وهكذا.
كون انك تسيب الفكرة وتبدأ تقول للشخص اللي بينصحك
اصل انت مش فاهم وجهة نظري
اصل انت مش عارف تشوف الموضوع كويس
اصل انت – بجد قال كده – تفكيرك محدود.
واخيرا، انت ولا فاهم وجهة نظري ولا فاهم البيزنس اللي انا بعمله وتبدأ انت تنصحني بقى باني ابقى اركز كويس وانا بنصح الناس بعد كده علشان نصيحتي ليك سيئة جدا وبتضرك!
انا طبعا كان ممكن اسمع الشخص دا ما لذ وطاب، بس انا فعلا بقيت اهدى كتير عن زمان،
يعني هو طلب نصيحتي وفي الاخر بيقولي انت نصيحتك دي مش بتساعدني دا لوحده انا ممكن ابني عليه موضوع تعبير من ٣ صفح ينتهى بقطع علاقتي بالشخص دا للأبد
ولكن انا التمست للشخص دا كل الاعذار انه مضغوط علشان داخل حاجة جديدة واكيد ضاغطه تفكيره فسكت وقولتله لما تهدى ابقى شوف الكونفرزيشن تاني يمكن ساعتها يشوف انه اد ايه كان بيهاجمني انا مش بيهاجم رأيي.
ويشوف انه ماكنش يصح يهاجمني اصلا، يعنى اصل حتى لو اللي قدامك دا بهيم ومابيفهمش حاجة. انت طلبت منه نصيحة، مش عاجباك… خلاص قوله شكرا وبينله انك ممنون للوقت اللي هو ضيعه مع سعادتك.
لكن ينصح فتهاجمه، جديدة عليا دي الحقيقة.
فياشباب المستقبل، قدروا الناس اللي بتنصحكم.
وقدرو ان النصيحة مش لازم تبقى على هواكم – بل انه في معظم الوقت هتبقى مش على هواكم وعكس اللي انتوا بتفكروا فيه –
والنصيحة وارد تبقى صح ووارد تبقى غلط لكن ردك على النصيحة بأسلوب مش كويس – حتى وان كانت في رأيك اسوء نصيحة في الدنيا، وحتى وان كانت -بالفعل- اسوء نصيحة في الدنيا – دا هو ” الاكيد ” غلط.