يعني للي ناوي يخلف.. أو للي مخلف واحد أو أكثر.. عندي كام نقطة هاتجنن ويوصلوا لناس كتير حتى لا نتكاثر مآسي ومصائب.
1- قرار اﻹنجاب مسئولية.. مش حسنة بتثبت بيها للناس إنك مش عاجز ولا ناقص.
2- ماتخلفش عشان عندك فراغ أو حاسس إنك معندكش إنجاز في حياتك. هتجيب الولاد هتبقى المعادلة همك+هم الولاد+الفراغ الداخلي+إحساسك بالفشل=إكتئاب وتربية فاشلة.
3- اﻹنجاب كان قرارك إنت مش قرار ولادك فماتفضلش تذل فيهم إنك سبب وجودهم في الدنيا. يمكن لو كانوا إختاروا مكانوش جم الدنيا أصلا فكفاية إنهم مسامحينك على الغلطة دي.
4- إنك ريبت وكبرت وراعيت وصرفت ده مش فضل ده جزء من مسئولياتك لو ماعملتوش تبقى أب أو أم فاشلين ومقصرين وتستحقوا الحساب.
5- قرار اﻹنجاب هو قرار تضحية في حد ذاته.. إنك هتضحي بالجزء اﻷكبر من صحتك ووقتك ومالك ومجهودك وحياتك ﻷولادك.. فلما يكبروا ماتقلش أنا ضحيت عشانكوا.. هو package اﻷطفال بيبقى كمبو متعة مع مشقة مع تضحية مع ونس وأمل وحاجات كتير متناقضة..
6- إبنك حتى لو فضل في نظرك عيل صغير وبالنسبة لك الكائن إللي نزل مع “اﻹفرازات” بعد إذن حضراتكوا هو بردو رغم إنكاركم بيكبر ويبقى كائن ثالث مستفل ومختلف.. حاولوا تقبلوا ده وتحترموه.
7- أولادكم مش ملككم. هما مزيج من اﻷصحاب على الخلفاء على السند. هما مش ملكية.
8- لما تغلطوا إعتذروا لولادكم.. بلاش ديكتاتورية ولا كبر.. خليك في نظره المعلم إللي بيقلدوا ويحبه أحسن من السلطان إللي مجبر يستحمله و بيخاف منه فبيكذب عليه.
9- زي ما تكون هيكون ولادك.. لو فيهم مشكلة تبقى مشكلتك.. ظبط نفسك معاهم هما هيتظبطوا. (في الغالب)
10- أولادك صحيح طلعوا من بطن واحدة بس مش متطابقين.. مش شبه بعض.. كل واحد منهم ليه شخصية وطربقة ورغبات ومفاتيح وأقفال.. ماتعاملش الكل بنفس الطريقة ومتوقع نتيجة واحدة.. من اﻵخر المياه والزيت غير المياه والفاكهة غير المياه واللبن.. نفس المادة مع ناس مختلفة مش هتطلعلك نفس النتيجة.. ادرس شخصية ولادك وعامل كل واحد بشخصيته هو.
11- إبنك مش لازم يكون زيك ولا زي مانتا عايز عشان يكون كويس في نظرك.
12- لﻷسف كأب وأم مش دايما بتكونوا فاهمين أكتر ولا عارفين أكتر.. هي مش بالسن.. هي بكم الخبرات ومدى اﻹنفتاح والمعرفة والقدرات الشخصية.. وكحقيقة علمية كل جيل بيطلع أذكى من الجيل إللي خلفه. فاحترموا عقول وآراء ولادكم شوية.
13- كفاية نقد.
14- عليك تنصحهم مش تتحكم فيهم
15- العنف أسهل من الحوار واﻹقناع.. الضرب واﻹيذاء اللفظي دليل على ضعفك مش قوتك.. العنف يعرف يهد.. بس ماتقدرش تبني غير بالقوة والعلم مع بعض.
16- جرب تسمعهم من غير نصائح.. تسمعهم كصاحب ومعجب وحبيب ورفيق..
17- التفرقة بين الولد والبنت في المعاملة والحب والفلوس حرام.. بالمناسبة لو جبت ﻹبنك شقة في حياتك عليك تشتري لكل بنت بنفس القيمة.. او ضحكت في وش واحد تضحك في وش إخواته وهكذا.. الرسول (ص) قال ” إعدلوا بين أولادكم في النحل كما تحبون أن يعدلوا بينكم في البر واللطف ” وقال ” سَاوُوا بَيْنَ أَوْلادِكُمْ فِي الْعَطِيَّةِ ، فَلَوْ كُنْتُ مُفَضِّلا أَحَدًا لَفَضَّلْتُ النِّسَاءَ ” .
18- خلوا ولادكم يحبوكوا مش يخافوا منكم.. الحب أقوى من الخوف..
19- إبنك ولا بنتك إللي مش حلوين ولا ماخدوش خضار عيونك أو بياض جدة باباكي مالهومش ذنب يسمعوا تحسراتكم ليل نهار. لو كانوا إختاروا كانت كل الولاد بقوا براد بيت ومارلين مونرو.. لما تلوموا لوموا على حاجة إختاروها ويقدروا يغيروها.