في ناس عايشة وسطنا الناس دي حساسة بدرجة كبيرة،
ممكن لو حد بص ليهم بصة مش كويسة ده كفيل إنه يقفل يومهم ويسببلهم حزن لفترة من الوقت،
ممكن تعليق على شكلهم يقعدهم أيام في البيت مش قادرين يخرجو يواجهو العالم الخارجي،
وطبعا لأننا بنعيش في وسط الكثير من البهائم فالموضوع مبيكونش مقتصر على بصة أو كلمة،
لكنه بيتعدى للتعليقات السخيفة والتدخلات اللي ملهاش لازمة، ونصائح عاللبس، وطريقة الكلام، وإسلوب الحياة،
واللي بيترتب عليه إن حياة الأشخاص الحساسين تبقى صعبة وأشبه بالجحيم في وسط هذا الكم من الجلافة والجحشنة من المحيطيين.
ووصفي هنا للحياة بكلمة صعبة هو أقل حاجة ممكن أقدر أوصف بيها حياة الناس دي،
لأن الأمر مع بعضهم ممكن يوصل لإصابتهم بأمراض أو الانتحار بسبب حد حلوف جحش قال تعليق على حاجة تخصهم زي لبس أو أسلوب حياة أو تصرف معين.
البهايم هيفضلوا موجودين ومش هنقدر نتخلص منهم للأسف، ولا هنقدر نتحكم في جلافتهم وحموريتهم،
ولكن نقدر نتحكم في نفسنا وفي حدودنا، ونقدر نحاول على قد ما نقدر نخليهم بعيد.
بشوف إن بداية نجاة الشخص وحفاظه على نفسه وعلى سلامه الداخلي بيبدأ أولا بحماية حدوده،
بيبدأ من رسم دايرة حواليه ويحدد مين اللي يدخل الدايرة ومين يفضل برة،
بيبدأ من رسم حدود واضحة لكل حد بيتعامل معاه،
الحدود هي اللي بتقول ده صاحبي وهقربه مني واقدر اتكلم معاه وانا متطمن إنه مش هيجرحني بكلمه،
وده هيبقى مجرد معرفة ممكن أبقى اسلم عليه لما أشوفه في الشارع،
وده مش هعرفه خالص ولو شوفته في الشارع حتى مش هبصله.
الحدود هي اللي بتقول مين مسموح ليه يتكلم في إيه ومين مش مسموح ليه.
حماية الحدود من وجهة نظري مش حاجة سهلة لأنها في بعض الأوقات هتضطرك إنك توقف تعامل مع ناس ممكن كانوا قريبين في يوم من الأيام، بس قربهم مؤذي، فهتبدأ تبعدهم، وده إحساسه صعب خصوصا على الأشخاص الحساسين لأنهم بيقدرو وبيحترمو مشاعر الطرف التاني وبيحسو بالناس حتى لو الطرف التاني داس عليهم.
رسم الحدود هو بداية لتقليل الأذى اللي بيقع على الشخص الحساس من الحلاليف اللي حواليه.
كمان تطبيق الموضوع مبيكونش أسهل حاجة، لأنه بيحتاج أحيانا قدر من اللامبالاه في التعامل مع البعض وقدر من تجاهل إحساسهم، لأن في بعض الأحيان هتبقى مضطر لعدم الرد على بعض الأشخاص في بعض الأمور، لأنها حاجة متخصهومش وهتوضح ده بشكل صريح أو غير صريح، أو تضطر تتجاهل تماما، أو تصده، أو تشتمه بالأم، على حسب التكتيك يعني اللي هتستخدمه معاه، وده بردو مش حاجة سهلة مع الناس الحساسة.
بالنسبالي الموضوع قدرت اعمله لما حصلي موقف ما خلاني غصب عني قطعت علاقتي بكل اللي حواليا، وبعدها بدأت أرسم الحدود دي علشان أعرف مين اللي هيبقى موجود وهكون مرتاح لوجودة ومين مش هيبقى موجود.
وأهم حاجة اتعلمتلها إني وأنا بعمل ده يكون الاعتبار الوحيد ليا أنا، لنفسي ولراحتي ولسلامي الداخلي، وأي حاجة تانية كنت بدوس عليها بالجزمة، لأن ده كان سبيلي الوحيد للخروج والنجاه وتقليل الضغط اللي عليا.
وطبعا بالنسبة للمحنكين اللي هيقولوا المفروض تتجاهل الناس دي، فالموضوع ده ممكن يبقى سهل لحضرتك لكن في ناس مبتعرفش تتجاهل مبتعرفش تعدي حاجة، مبتعرفش متركزش في كل كبيرة وصغيرة، في ناس طبيعتهم مختلفه عنكم عايشين معاكو في نفس هذه البؤرة الوسخة من الكوكب.