” أيمن سليم ” يكتب :
عزيزى ” محمد رمضان ” كله رايح حتى نمبر 1 
✋
” محمد رمضان ” من مواليد سنة 1988 و بدايته فى الوسط الفنى كانت سنة 2005 فى مسرحية ” قاعدين ليه ؟ ” مع النجم الكبير ” سعيد صالح ” يعنى كان وقتها عنده 17 سنة يعنى فى ثانوية عامة و بيمثل قدام نجم بحجم ” سعيد صالح ”
– سنة 2006 : جسد شخصية ” أحمد ذكى ” فى مسلسل ” السندريلا ” مع ” منى ذكى ” و فى نفس السنة مثل دور مهم فى مسلسل ” أولاد الشوارع ” مع ” حنان ترك ”
– سنة 2007 : وقف قدام النجم العالمى ” عمر الشريف ” فى مسلسل ” حنان و حنين ” و عمل مسرحية ” يمامة بيضا ”
– سنة 2008 : اشتغل 4 مسلسلات منهم مسلسل ” فى ايد أمينة ” مع ” يسرا ” و وقع عقد احتكار سينما مع المخرج و المنتج ” محمد العدل ” بمرتب شهرى و أجرله شقة فى شارع ” فاطمة رشدى ” و جاب أول عربية فى حياته ” لانسر شارك ” و اتجوز آخر السنة دى يعني كان عنده 20 سنة و متجوز – شقى بصراحة
– سنة 2009 : شارك فى بطولة مسلسل ” هانم بنت باشا ” مع ” حنان ترك ” من الجلدة للجلدة و شارك بدور فى مسلسل ” حكايات و بنعيشها ” مع ” ليلى علوى ” و عمل فيلم ” احكى يا شهر زاد ” مع ” منى ذكى ” تأليف ” وحيد حامد ”
– سنة 2010 : عمل أفلام قصيرة زى ” اليوم العاشر ” و ” ستر و غطا ” و شارك بدور فى مسلسل ” الجماعة ” اللى كان برضو تأليف ” وحيد حامد ” و اخرجه ” محمد ياسين ” و غير عربيته ل ” جيتا ” زيرو
– سنة 2011 : قام ببطولة فيلم ” الشوق ” و ” برد يناير ” و ” الخروج من القاهرة ” و قام ببطولة مسلسل ” احنا الطلبة ” و أجره عليه كان 600 ألف جنيه و غير عربيته ل ” كومودو جيب ”
– سنة 2012 : شارك فى بطولة فيلم ” حصل خير ” و ” ساعة و نص ” و فى نفس السنة قام ببطولة أفلام ” الألمانى ” و ” عبده موتة ” و فى نفس السنة شارك فى مسلسل ” كاريوكا ” مع ” وفاء عامر ” و تولى بطولة سيت كوم ” الشركة ”
– سنة 2013 : عمل مسرحية ” رئيس جمهورية نفسه ” و عمل فيلم ” قلب الأسد ” و اتجوز للمرة التانية – شقى أكتر من الأول
– سنة 2014 : عمل مسلسل ” ابن حلال ” كبطل أول دراما و عمل فيلم ” واحد صعيدى ”
– سنة 2015 : عمل فيلم ” شد أجزاء ” و تولى بطولة حلقتين من مسلسل ” استيفا ”
– سنة 2016 : عمل مسلسل ” الأسطورة ” و صرح بأنه الأعلى أجر فى الدراما و أجره وصل ل 25 مليون جنيه و عمل مسرحية ” أهلا رمضان ”
– سنة 2017 : عمل أفلام ” آخر ديك فى مصر ” و ” جواب اعتقال ” و ” الكنز ” و مسلسل اذاعى و اعلان اتصالات و إعلان كوكاكولا
– سنة 2018 : مسلسل ” نسر الصعيد ” و اعلانات اتصالات
طبعا تجربة العيل الصغير اللى فى ثانوية عامة و بيقف قدام نجوم كبار و بيمثل و بيتعرف و قدر يوصل للملايين و للبطولة المطلقة فى السينما و الدراما دى تجربة هايلة و حلم جميل و مثال حلو نصقفله .. لكن الكلام عن التعب و الشقى و كان الجمهور بيرمينى بالقوطة و النجوم الكبار كانت مش بتخلينى امثل معاها و بيغيروا منى .. القصص دى امتى ؟ التعب و الشقى ده كان سنة كام ؟ هل معاناة ما قبل ال 17 سنة كافية لانها تخلينا لحد انهاردة بندفع تمن انك مابقتش نجم من و انت فى اللفة ؟ ممكن تذكرلنا كام وجه جديد ساعدته و اديته فرصة ؟ و كام واحد ” مش واحدة ” طلب انه يزورك فى مكتبك و رفضت تقابله ؟ زى ما انت كنت بتترفض و بترجع تشتم النجوم اللى رفضوا يقابلوك على حد قولك .. خذلت كام صديق ؟ بعدت عن كام واحد كنت واعده يبقى جنبك لو بقيت نجم ؟
لو فضلت تقول انك اتعذبت و شقيت فهيبقى معاك حق فى انك اتعذبت و شقيت فى الطريق من بيتك لشركات الانتاج عشان تمضى و تاخد عربون المفروض كانوا يجوا يمضوك فى البيت عشان ماتتبهدلش
قصص استعطاف الجمهور كنا متعودين عليها من ” عبدالحليم حافظ ” و ” اسماعيل يس ” و ” أحمد ذكى ” و غيرهم لان قصصهم المميز فيها عن القصص اللى انت بتحكيها هى انها حقيقية عشان كدة كنا بنصدقها و بنتعاطف معاها و بينى و بينك ماكناش عايشين احنا وقتها لكن واحد بذكائك ممكن يدورله على طريقة تانية للاستعطاف غير اللعب بالحقايق و تزييف تواريخ موثقة .. ها بقى ؟ قولتلى انت شقيت سنة كام ؟!
https://www.facebook.com/ayman.selim.108/posts/10216704992405286