التصنيفات
المدونة

قواعد بخصوص الفلوس والعملاء

فيه حاجات إحنا اتعلّمناها بفلوس هقولها لك وحاول تتعلّمها ببلاش
وإن كنت متأكّد إنّك وحتّى لو اقتنعت بيها مش هتنفّذها إلّا لمّا تخسر فيها فلوس

القاعدة الأولى /لمّا تحاول تقول لحدّ على حاجة بتلميح
هوّا مش هيفهم التلميح
واعتبر إنّك ما قلتش حاجة

ولو تخيّلت إنّك هتجامل حدّ وهوّا هيردّ لك المجاملة فالموضوع زيّ التلميح هوّا ما شافش مجاملات وما سمعش تلميحات

القاعدة الثانية /قسّم أيّ شعل لمراح
لخد فلوس المرحلة الأولى مقدّم
اعمل المرحلة الأولى
سلّمها

خد قسط المرحلة التالية
اعملها
سلّمها

ولازم تكون خدت تكاليفك كاملة قبل القسط الأخير
ولو عرفت تاخدها قبل القسط قبل الأخيرأو قبل القسط قبل قبل الأخير يكون أفضل

وما تبدأش مرحلة إلّا لمّا تكون خدت فلوسها
ولو العميل ما وافقش ما تكمّلش معاه شغل
ولو اتشقلب عاديّ

القاعدة الثالثة /لو تعشّمت إنّ حدّ هيعمل لك حاجة من نفسه
فهوّا مش هيعمل حاجة
ولو تعشّمت إنّك هتعمل حاجة لحدّ فهيردّ عليك بحاجة مماثلة
فهوّا مش هيعمل لك حاجة بردو

مش بقول لك ما تعملش خير
لو عاوز تعمل خير اعمله بسّ ما تربطوش بأيّ حاجة إطلاقا
ولا تنتظر من وراءه أيّ حاجة إطلاقا

لسببين
اوّلا
إنتا كده مشرك في الخير ده حدّ مع ربّنا
فالخير مش هيتقبل منّك
الله سبحانه وتعالى أغنى الأغنياء عن الشرك
ولا يقبل من العمل إلّا ما كان خالصا لوجهه الكريم-وخالصا يعني خالصا…يعني 100 % عشان ما يبقاش تلميح

ثانيا
اللي إنتا أشركته مع ربّنا ده أساسا مش هيكافئك على الخير اللي إنتا أشركته فيه مع ربّنا فإنتا هتبقى مشرك وخسران

فإمّا إنّك تعمل عمل لله سبحانه وتعال ىبنسبة 100 %ولا تنتظر أيّ مقابل من البشر
أو تعمل عمل دنيويّ بحت وتطلب 100 % من المقابل بتاعه من البشر

القاعدة الرابعة /الفلوس ما فيش فيها حياء
ولو تخيّلت إنّ اللي قدّامك هيفهم إنّك استحيت تطلب حقّك فهيعطيك حقّك من نفسه
فهوّا بينه وبين نفسه فهم إنّك مش عاوز فلوس وإنّك عملت له الشغل ده بدون مجهود وبناءا عليه إنتا مش مهتمّ تطلب أجر عليه

القاعدة الخامسة /الفلوس ما فيش فيها عشم
لو تخيّلت إنّه عشان صاحبك فمش هيفرق معاه يدفع لك تمن حاجة
هيّا مش هتفرق معاه مرّة
لكن في المرّة التانية هيتوقّع إنّك إنتا اللي هتدفع
أمّال فين العشم ؟!ما قلت لك ما فيش حاجة اسمها عشم

القاعدة السادسة /الحبّ مش بفلوس
يعني لو بتحبّ حدّ
فإمّا تعمل له شغله بسعره كامل
أو تتجنّب الشغل معاه أصلا
أو تعمل له شغله كلّه ببلاش
أو تعتبر الخصم اللي قدّمته كأنّه لم يكن
يعني لا تتوقّع أيّ ردّ فعل تجاه هذا الخصم

والمتوقّع من الشخص ده إنّه في المرّة التانية للتعامل
إنّه هوّا اللي يطلب منّك ما تعملّوش خصم

لو هوّا ما عملش كده إنتا إلغي الخصم من نفسك وقول له إنّ الخصم بيكون في المرّة الأولى فقط
ولو بتحبّه قويّ حافظ على الخصم بسّ بردو حافظ على فكرة إنّك لا تنتظر شئ مقابل الخصم

القاعدة السابعة /ما فيش حاجة في الحياة اسمها ( خصم )
فيه إنّ حاجة ب 90 أقول لك إنّها ب 100 وعليها 10 % خصم فبقت ب 90 لكن ما فيش حاجة ب 100 هتتباع ب 90

وفي آخر الموسم الحاجة اللي بتتباع بربع ثمنها بيكون فيها مكسب
أو ع الأقلّ بكون حقّقت مكسب الشحنة كاملة في أوّل الموسم والبضاعة المتبقّية دي أصبحت بالنسبة لي ببلاش

فإمّا أرميها في الزبالة
أو أبيعها بأيّ فلوس وأيّ فلوس هتكون مكسب مقارنة بإنّها تترمي في الزبالة

بسّ مش ده المهمّ
المهمّ هو إنّك لمّا هتقول لحدّ إنّك عامل له خصم فهوّا كده مش هيعتبر إنّك جاملته فما تتوقّعش إنّه يردّ لك الجميل لأنّك أساسا ما جاملتوش فهيردّ لك جميل إيه حضرتك؟!

الخصم ده عامل زيّ الفيونكة اللي الحلوانيّ بيلفّ لك بيها كيلو البسبوسة، ساعة ما بتروح البيت بتفكّ الفيونكة ترميها خلاص مش هنحنّط لك الفيونكة اللي عملتها يعني

القاعدة الأخيرة بتقول
في كلّ مرّة هتعتبر إنّك في موقف استثنائيّ
الموقف ده مش استثنائيّ ولا حاجة
هوّا موقف عاديّ


والشخص اللي إنتا بتستثنيه هو شخص عاديّ
لا بيشوف مجاملات ولا بيسمع تلميحات ولا هوّا كان راضع عليك وسافر ورجع فالعشم مفرتك الترنك معاه

هوّا شخص عاديّ جدّا عليك أن تطبّق عليه القواعد السابقة
أمّا بخصوص الناس اللي وجوههم باسمة ونغمة صوتهم مثل نغمة صوت جدّتك ويا أخي قلبك استريّح له كده ما تعرفش ليه فهو شخص عاديّ بردو


المصدر