عن غلطة احمد فتحي في روسيا

يا أحمد انت أخدت كاس أمم أفريقيا للشباب وكاس أمم أفريقيا للكبار، شاركت في كاس العالم للشباب وكاس العالم للكبار، شاركت في الأولمبياد وكاس القارات، أخدت الدوري المصري وكاس مصر وكاس السوبر المصري ودوري أبطال أفريقيا وكاس السوبر الأفريقي وشاركت في كاس العالم للأندية، احترفت في إنجلترا ولعبت في الدوري الممتاز، انت حققت كل حاجة ممكن لاعيب كورة مصري أو عربي يحلم بيها، وعمرك ما قصرت في الملعب ولا خذلت فرقتك ولا منتخبك في أي مناسبة، انت من أول كاس العالم للشباب في الإمارات 2004 لحد النهاردة في كاس العالم في روسيا 2018 بتلعب أساسي في النادي والمنتخب، 14 سنة كانوا مليانين بالجهد والبذل والعطاء والرجولة في الملعب، عندك 34 سنة ولسه بتلعب بروح وبتموّت نفسك وربنا كافئك انك بقيت كابتن المنتخب في كاس العالم كنتيجة حتمية وتكليل عادل يليق بمجهودك طول السنين اللي فاتت دي، مش هيلومك حد فاهم وعارف ان الغلطات دي بتحصل في الكورة عادي، وأكيد مكانش قصدك، وكلنا لسه من كام يوم كنا بنشيد بادائك ورجولتك في ماتش أوروجواي، متقساش على نفسك وتشيل ذنب خسارة النهاردة لإنك عملت اللي عليك وشلتنا كتير أوي، مفيش حاجة في الدنيا تستاهل النظرة اللي في عينيك دي، ومفيش لاعيب واحد يستاهل أو يستحق يحس الإحساس اللي انت حاسه دلوقتي، خصوصًا لو اللاعيب ده هو إنت!