التصنيفات
مقالات الضيوف

عن الجواز

– الجنس الفاشل .. حتما سيفضي إلى جواز فاشل .. علشان كدة لو عندك مشكلة جنسية ؛ قبل ما تتجوز لازم تصارح خطيبتك .. قولها أنا بعاني من كذا وكذا ؛ وانتي كمان لو عندك مشكله صارحيه بيها .. دا اهم من النيش والستاير والقايمة .. مفيش كسوف في الحاجات دي .. حياتكم على المحك .. إخفاء حاجات زي دي .. يعتبر خيانة أمانة .

لو إتبسطوا في السرير الجوازة “ممكن” تنجح .. لكن لو فشلتوا .. الجوازة “لازم” هتفشل ..

– إتجوز وإنت واثق 100% من إنك فعلا عايز تتجوز .. مش متجوز علشان الناس بتتجوز أو علشان عندك حرمان جنسي .. أو هتتجوزي علشان بنت خالتك كانت أمورة جدا في فستان الفرح .. صدقوني المشرحة مش ناقصة قتلة ..

– الفلوس مهمة .. اتجوز وانت مش مديون عالأقل .

– لو قررتوا تتجوزا .. اتجوز واحده شبهك ومناسبة ليك .. متتجوزش حد مختلف عنك في طباعه واهتماماته وتقول هغيره بعد الجواز .. محدش بيتغير بعد الجواز والله العظيم تلاتة .. لازم يبقى في اهتمامات مشتركة وهوايات مشتركة علشان تلاقوا حاجة تعملوها سوا وإلا كل واحد هيتعزل في جزيرة لوحده .

– طول فترة الخطوبة .. طولها قوي قوي .. خد راحتك ولو حسيت انك مش قادر .. متخبط .. مش مستعد .. اعتذر وأمشي .. تقول إللي تقوله عنك .. إمشي .. وإنتي كمان لو حسيتي إنك مش قادرة ومش واثقة .. قوليله سلامو عليكي

هيوجع شوية .. بس مش هيوجع قد انكوا تطلقوا او تعيشوا تعساء مدى حياتكم في جوازة فاشلة علشان العيال.

– إتجوزتوا خلاص ؟؟ مبروك .. متتسرعوش في الخلفة .. إهدى يا حبيبي ؛ الكوكب مش هيستفيد أي حاجة من روح جديدة .. خلينا نتأكد الأول إن الجوازة مستقرة وناجحة .. خدلك سنة أو سنتين أو حتى 5 سنين .. اتبسط وعيش حياتك وإتأكد إن فعلا الجوازة دي مستقرة .. وإبهرنا يا سيدي بقدرتك عالتخصيب بعدين .

– إتطلقتوا خلاص ؟؟ معلش بتحصل ودي مش نهاية الكون.. إتطلقوا بإحترام .. لو سمحت إتطلقوا بأدب وذوق .. بهدوء .. علشان عيالكوا ؛ أقعدوا مع بعض وشوفوا هتعملوا إية.. مهما كانت مشاكلكم وإنتوا متجوزين لازم تتكلموا عن بعض قدام عيالكم بشكل محترم ومهذب .. علشان عيالكم يطلعوا أسوياء نفسيا .. كفايا مرضى نفسيين في كل حتة حوالينا .

– عدم صرفك على عيالك وطليقتك دا بيجعل منك كائن إبن كلب مش راجل أبدا .. مفيش حاجة إسمها ” مش إتطلقتي .. طب أولعي بقى انتي وعيالك ” .. ارجوك متبقاش إبن كلب .. معلش حاول .
عندك مشاكل مادية ؟ اقعد معاها واشرحلها وشوف هتمشوا اموركم ازاي .. انما تختفي وتسيب البنت تولع بجاز هيا وعيالها .. فزي ما صارحتك من شوية .. دا ملهوش غير معنى واحد .. إنك إبن كلب .

https://www.facebook.com/7ogzz/posts/10158695293445437