نظراً لظروف كتير اتحطينا فيها ، مروحتش مدارس نهائي من 3 إبتدائي لغاية ما خلصت 3 ثانوي … تولت والدتي تعليمي بالكامل حتى 3 إعدادي دون اعتماد على مدرسين نهائي ….
#علمتني أمي
مخافش أسأل …عشان اللي مش بيسأل هو اللي عنده حاجة غلط
أقول إني مش فاهم … عشان اللي مش فاهم هو اللي عنده مصيبة
كل حاجة لها تفسير ندور عليه. كل معلومة مكتوبة في الكتاب حد هو اللي كتبها، فعادي ينفع تعرف هي جت منين و ليه، مفيش حاجة مكتوبة بطريقة ميقدرش الإنسان يقلدها إلا القرآن …غير كده هو كلام ناس زينا ينفع نناقشهم و نفكر فيه و نعترض عليه كمان
مش شرط السؤال يكون ليه إجابة واحدة ، وإن اللي يقولك إن لازم تجاوب كده مشكلته إنه ميعرفش غير الإجابة دي
الشغلانة اللي محتاجة عضلات سهلة بس رخيصة … و كل ما هتفكر سعرك هيعلى. متحفظش حاجة …المهم تفهم
مش دايماً محتاج حد يشرحلي ، ممكن أحتاج حد أسأله في اللي مفهمتوش. إنما الطبيعي إني أقرأ و أفهم ..واللي مش طبيعي إنك متفهمش غير لما حد يشرحلك
العلم مبيتاخدش في معلقة …العلم محتاج مجهود و صبر …وإلا كان زمان كل الناس علماء عادي
عادي على فكرة لما تجرب تفهم حاجة و متعرفش من أول مرة ، ولا من تاني مرة …ولا عاشر مرة ….خليك وراها لحد ما تفهم … محدش قال إن الدنيا سهلة …الدنيا صعبة على اللي مكسل يفهم
لو أردتم تعليماً قيماً لأولادكم ، فسيروا على خطى أمي